Seyran Suleyman kir
.pdfО, кёр дюньяда козь арай, Базан не япкъанын корьмей. Къура озюне бир сарай, Факъат тек шиирде ольмей.
2006 с. майыс 2
ДЁРТЛЮКЛЕР
***
Кок ве ернинъ мимары Аллахтыр, Мимардан бир арзумыз бар бахттыр. Серден шереф къыдыргъан ахмакътыр, Акъ дердине дерман тапман шарттыр.
***
Бизге «хаинлер» дедилер, Бизге «делилер» дедилер, Амма делиллер кетирмедилер, Кенди-кендини едилер.
***
Шаирлерин бешигини тепреткен – миллет, Татлы сёзнен юрегини ириткен – миллет. Къалемине къувет берген кене де – миллет, Къадирине еткен де, етмеген де – миллет.
***
Эр бир буюк севги Юректе из къалдыра. Сакъын, изге тийме – О, гузельден хатыра!
***
Дюнья деген дегирменде Бинъ бурьтюктен бири мен де: Арман къазыкъ укюминде, Бир сёз – шиир тюркюминде.
***
Битти къаде ичинде шарап, Арзу-умютлер олды харап. Сонъки гедже танъыны арап, Битти омюр – юрекни парлап.
***
Бинъ тюрлю сес арасында Джоюлса сесинъ – Тек ананъ эшитир сени, Янынъда дерсинъ.
***
Кутюкни тахт, деп санып янъыламыз, Путкъа табынгъандай биз табынамыз: Кими мал-мулькке, кими озь нефсине, Ангиси исе бирден эписине.