N_K_Lebedevo_Arkhangelska_robinzony

Н.К. Лебедево

АРХАНГЕЛЬСКА

РОБИНЗОНЫ

Библиотека пиро география

ваш начяльно школа

Н.К. Лебедево

АРХАНГЕЛЬСКА

РОБИНЗОНЫ

Роспхеныбен ваш штаре

манушенгиро джиибен пре северноне полярноне морёскиро

острово, пре саво на сыс ни екх манушано ди.

Пирилыджия студенто

Романе педтехникумостыр

А.В.Васильево

Государственно

Учебно – педагогическо издательство

Москва 1935

Кон адасаво сыс Робинзоно

Робинзоноса кхарна кажноне манушес, саво поперла дре саво-нибудь штето, кай нане ни екх джидо ди. Адасаво лав гыя екхестыр английсконе матросостыр пиро лав Робинзон Крузо, ваш конеске чиндя екх английско чиныбнари пашыл дуй шела берша одолеске пале. Робинзоно Крузо, коли лескиро кораблё хасия, попыя пре адасаво острово кай на сыс ни екх джидо ди. Пирдал муршыпе и джиды годы ёв на хасия, а проджиндя пре острово бут берша и высыклыя кокоро те керел песке разна вещщи ваш джиибен.

Дре амари лылвари роспхенелапе на выдуминдлы Робинзоноскири история, а чячипен ваш штаре архангельсконе поморенге-промыщленникенге. Ёне попыне пре ледяно острово и проджиндле пре адава острово шов берша, на дыкхи ни екхе джиде манушес.

Полярно морё

Дре июнё 1743 берш е форостыр Мезень, дре Архангельско губерния, выгыя дре Парно морё набари парусно лодка. Пре лодка сыс дешуштар мануша поморы-промышленники.

Пре ладья сыс барыдыреса Алексеё Химково, - леске сыс пашыл пандждеша берша, вавре сыс терныдыр. Саре шукир джиндле морё.

Пре северо – на пхув, а морё чяравела манушес. Мануша, саве дживена пиро морска бреги – поморы – заленапе морсконе промысленца и одолеса, со старена мачен. Инке панджшела берша одолеске пале перва русска джиибнарья пре Парно морьё залынепе адале промыслоса, и одле бершендыр ленгире чяве чяравенапе адале бутяса. Пхув пре северо на шукар бияенела маро. Лынай сы тыкно и шылалало. Би морсконе промыслоскиро манушеске дре северно краё те продживес сы пхаро.

Химково е товаришшенца мекнепе пре морска промыслы. Пирдал набут дывеса ленгири ладья выгыя е Парне морёстыр пре бугло Полярно или Ледовито морё, буглыпе савескиро на обухтылеса якхенца.

Ледовитонеса адава морё кхарлапе пирдал одова, со адай пхердо берш, зимакиро и лынаскиро джяна баре ледяна крыги и ледяна берги.

Росчюрдыяпе шылало Полярно морё бутыр сыр пре штар тысенцы километре дленгимаса и адякицы же километре буглыпнаса.

Бут пре адава морё пашле островы. Островы адале учякирде ивенца и леденца. Адай пхерде еня чёна дре берш терды зоралы зима. Октябрёстыр жыко февралё кхам адай на сыкавелапе пре болыбен. Саро адава времё терды калы рат. Дре адале кале ратя джяна зорале вьюги. Мразы доджяна ке пандждеша градусы.

Не и лынаскиро пре дуратуно северо набут сы федыдыр сыр зимакиро. Оке кхам тердо дре июнё и июлё кренгла дывеса пре болыбе, не ёв газделапе научес. Лескире банге лучи намиштес таткирна пув и на можынена те розбилавен баре берги, ив и лёдо.

Лынаскиро пре Полярноне морёскире островы барыдыр пандже-шове градусендыр татыпе нане, пирдал адава адай ничи на барьёла. Дре варисаве штете кхамитка лучи страдена ив теле, и дре адава штето пхув керлапе блатаса, пхув оттаинела, не на барыдыр паш метростыр. Пе адале штете выбарьёла налачи чяр.

Сари адая бари область, кай пашло северно шылало морё, и саре пхувья пре лате кхарнапе северноне полярноне областяса. Адая область кхарлапе адяке пирдал адава, со дре адая пхувьякири строна, сави пашлы пашылыдыр ке аме, - адава дуитко острово Неви пхув, и островы Щпицберген, или, пиро пхурано кхарибе, Груманто.

Неви Пхув пашлы дур пале Архангельско. Архангельскостыр ке Неви Пхув морёса сы бутыдыр тысенцо километре. А островы Шпицберген пашле ке западо е Неве пхувьятыр ангил амаро Мурманско побережьё.

Неви Пхув тырделапе дре дленгипе пре тысецо километро, а дре буглыпе дре варисаве штете – триянда и барыдыр ке шел километры. Учякирды ёй баре бергенца.

Коли те джяс пашыл брего Неви пхув, то можно те дыкхес, сыр берги тердёна са учидыр и учидыр. Саре берги сы учякирде ивеса и лёдоса. Вершыны терде дре тумано и адалэстыр берги сыкадёна инке учидыр.

Зимакиро пре Неви Пхув нане шылалыдыр, сыр дре бут Сибирякире штеты, не адай на барьёна веша: лынай адай тердо курке деш и татыпе николи нане барыдыр пандж-ефта градусы.

Дре варисаве штете, не адасаве штеты сы набут, зоралыдыр притатькирла кхам, и адай пале барьёла набари чяр, и сыкавенапе кой-кай набаре кусты: ползучё ива и брезы-стланки. Не ивы и брезы пре Неви Пхув на здена пре амаре. Адава – даже нане кустарнико, а тыкнинька кустики барьипнаса дре саве-то сантиметры. Полярно ива набут подджяла ке тошшё кустико брусника. Адая набари ива вымекела веснакиро ченя и цвете.

Дре саме тате штеты пре Неви Пхув, кай нане балвал, барьёна мури – морошка и росчюрдела пескире веточки сыр плетнё мури вороника.

Не тыкно лынай нане дре зор те розбилавел саро ив пре Неви Пхув, и дре августо адай заленапе мразе, а сентябрёстыр заджяла дре зор зима.

Дре Полярно морё инке сы адасаве пхувья сыр Шпицбергено и вавре, пре саве гин-со нане растительность.

Шпицбергено саро учякирдо бергенца, палсо и сыс дыно леске адава лав. Шпицбергено адава сы «остроконечна берги.»

Пхувья Шпицбеогено или Груманто, пашле кезападо пре расстояниё пашыл тысенцо километро е Неве Пхувьятыр. Шпицбергено и пашылатуно леса островы чястес кхарнапе мореходенуа «трашане» пхувьяса. Зима адай терды еня чёна, а трин чёна дре берш кхам на газделапе про болыбе. Дре ратякиро калыпе и дре шылалыпе адай чястес джяна ивитка бураны.

Адай набут попернапе даже адасаве тошшя растении, саве сы пре Неви Пхув. Только буро мохо урьела песа дре кой саве штете скалы, саве лынаскиро на рикирна пре песте ив. Пустынна и дика даже лынаскиро бреги пре Шпицбергено.

Соса сы барвале полярна строны

Полярна пхувья – сама чёроре пиро пхувьякиро бияныпе. Не палодова дре Полярно морё сы бут маче и разна морска звери – киты, моржы, тылени и вавре жывотна.

Бутыр сарестыр дре Полярно морё попернапе моржы. Моржы – адава баре жывотна ке трин-штар метры дленгипнаса, а сы и барыдыр. Ленде древан груба и дленга данда-клыки джяна пре выкерибе разна вешши. Моржы тиминякирнапе инке пало тхулыпе и грубо цыпа.

Пашыл морженца дре Полярно морё сы бут тюлени. Тюленё сдела пре моржосте, только сы тыкныдыр барьипнаса и нане лесте клыки. Тюлени попернапе дре морё пхерде стаденца.

Пре пескире надленга гера, саве кхарнапе ластенца, тюленё шукар плавине. Шылале панестыр тюленё на дарела, лесте, сыр о моржосте, тело цыпа сы грубо слоё тхулыпен, саво на промекела шылалыпе.

Тюлени и моржы на саро времё пролыджяна дро паны. Ёне чястес выджяна пре льдины, собы те татёс пре кхам. Тюлени древан ленива; выдыиндёна пре лёдо и кой-коли пиририсёна ке кхам, то переса, то думеса, то пашвареса.

Тюленё сыр и моржо, бут анела манушеске миште продукты. Тюленёскиро тхулыпе джяла пре сапуни, и сыр макхибнытко материало, а пре северо тюленёскиро тхулыпен джяла про лампы, - запарувела песа керосино. Мас ленгиро джяла про хабе, а цыпатыр сывена пустына, тыраха и вавре вещщи.

Дре Полярно морё дживена и киты. Кито – адава баро морско жывотно. Кито кокоро песа здела пре баре мачесте. Киты барьипнаса доджяна ке 25 метры дленгипнаса. Е китосте древан баро муй, дре саво локхес вджяла бари лодка, не данда лесте нане. Пре данденгиро штето ленде барьёна пре упратуны жанда адасаве дленга гибка рогова пластинки. Адале пластинки пре телатуно концо рикернапе пре отдельна тхава и здена пре бринды (бахрома). Адале бринды выденапе муестыр, сыр венцы (усы). Пир адава здыбен лен и кхарна китовоне венценца.

Чяравенапе киты тыкниньконе маченца и вавреса. Коли кито закамел те хал, ёв роскерла пескиро муй и плавинела пиро морё ангил. Дре муй панеса поперна мачёре и тысенцы тыкнинька жывотна. Е муестыр паны выджяла пиро муескире венглы, а мачё зарикирлапе пластинкенца дре муй китосте.

Якха китосте тыкнинька. Гера нане, а пре ленгиро штето ленде сы дуй плавники. Пори китосте здела пре маческири пори. Пре шеро е китосте ноздри, савенца ёв закедела дре песте фано. Ваш адава кито, вытховела шеро е панестыр. Ёв вычюрдела пре фано баро фонтано брызги и паро.

Дживена киты дре екхджиныпен или же иренца – дад, дай и екх или дуй чяворе. Не вавир моло киты скеденапе баре табуненца. Ке зима ёне уджяна дре тате мори, не лынаскиро рисёна пале пре северо.

Тело цыпа ленде, сыр е тюлененде и морженде пашло грубо слоё тхулыпе, саво на промекела шылалыпен.

Китоскиро тхулыпен и китоскире венцы древан сы куч и пирдал адава дре Полярно морё скеденапе бут промыслова мануша пало китенде.

Моржы, тюлени и киты дживена дре полярна мори, не на ёне сы хулая пиро полярно область. Чячюно хулай дре полярно область – ада парно рыч, или, сыр лес кхарна пре северо ошкуё. Парно рыч здела пре амаре бангегеренгире Мишкосте Топтыгиносте. Ёв дленгипнаса барыдыр, и бал пре лесте парно, рупово.

Е пхуре рыченде бал локхес учякирлапе жолтизнаса.

Зимакиро парно рыч псирла екхджино или дуйджине пиро ледяна фелда и подракхела тюленен. Парне рычя хана мачен, савен ухтылна дре паны. Лынаскиро ёне родена чириклытка яре и терне чириклорен. Парно рыч – дай биянела чяворен, на дари зима. Дре декабрё биянела дуе – трине чяворен дре ледяно берлога; ёне древан сыгес барьёна и ке весна выджяна барьипнаса сыр джюкел.

Веснакиро рыч-дай роспхагирла пескири ледяно берлога и вытырдела чяворен аври. Ёй сыклякирла лен те плавинел и те ухтылен мачен. Рычёре саро лынай псирна даса и только осенякиро чюрдена ла и ленапе те дживен пескиреса джиибнаса.

Парно рыч, надыкхи пре пескиро барьипе, сы лачё плавцо. Ёв джяла тел паны машкир льдины, закеделапе пиро ледяна берги и выдыкхела, кай пашле тюлени и моржы. Удыкхи пре лёдо моржос, ёв заджяла вавре стронатыр и чюрделапе ке моржо. Адяке подчёрлапе ке моржо рыч и адай зорьякирлапе те замекел пескире ная леске дре мен. Моржо рискирлапе, дела е дукхатыр годла и ползинела ке паны. Рыч инке екх моло замекела ная дре мен моржоске, и машкир рычесте и моржосте запханделапе марибе.

Вавир моло моржоске уделапе те подджял ке краё льдина и те перел дро паны. Рыч чюрделапе пал лесте и дре паны примарла моржос.

Парне рычи псирна и пе тюлененде. Задыкхи, кай плавинена тюлени, рыч бешела пре краё льдина и дужакирла лес. Сыр только задыкхья е панестыр тюленескиро шеро, рыч ловкес ухтылела лес. Пирдал набут менты тюленё сы умардо, и рыч вытырдела лескиро трупо пре лёдо и адай хала.

Лынаскиро дре полярна строны пре пхувья дре Ледовито морё приурняна древан бут морска чирикле. Чирикле сы адай адяке бут, со ёне чястес учякирна саре скалы и утёсы адяке, со пхабаке нане кай те перес. Адасаве штеты, кай сы бут чирикле, кхарнапе «чириклытка форья» или «чириклытко тарго». Адай, чячё, терды годла сыр про тарго.

Бутыдыр сарестыр приурняна дре полярна строны джиибен марла ключёса. Не сыр только подджяла августо и тырдёла шыл, джиибен уже нане. Саре чирикле урняна пре юго. Тюлени и моржы уджяна одорик, кай сы татыдыр. Аченапе пре зима парне рычя, песцы и полярна лисицы, саве родена песке пиро ледяна фелды хабе.

Морска звери, маче и чирикле гара притырденас ке пе пре дуратуно северо манушес. Саро лынай дре полярна мори и пре пхувья дре полярно область псирна тысенцы мануша. Пре шхуны, карбасы и шняки промышленники джяна пало тысенцы версты пескире кхерендыр и адай марна морсконе зверен, китен, моржонен, тюленен и скедена гагачьё пор.

Ваш адава гыя и Алексеё Химково товаришшенца дре Ледовито морё. Гыне ёне пре Неви пхув, карик псирнас кажно лынай.

Розмарде буряса

Охто дывеса погода сыс лачи. Лодка лыя те подджял ке Неви Пхув. Пре морё сыкадепе баре берги, учякирде ивеса и лёдоса.

-Не, пшала,атася аваса пре штето – пхендя Химково товаришщенге. Аме закхиныям – набут откхинёваса, а тоды ласапе и пало промысло.

Не екхатыр бельвель газдыяпе пре морё бари пурга. Запсирде пиро морё баре панитка волны. Тыкны ладья, сыр кашторо, чюрдыяпе стронатыр дре строна. Шылалы паны зачивелас палуба. Балвал зоралес традыя ладья дре вавир строна е Неве Пхувятыр.

-Нане лачипен, чявале, пхендя лоцмано. – Е буря бисабнаскиро роскхеллыяпе, галёв на удыкхаса аме Неви Пхув.

Саре задуминдлепе. Пхерде трин дывеса рундя морё. Только пре штарто дывес буря пирьячья. Пре болыбе сыкадяпе кхам. Не и кхаморо на дыя рада. Ёне удыкхне, со саро морё сыс учякирдо лёденца. Лёдо обкренцындя е шхуна, и кхетане лёдоса шхуна сыс отлыджины ке западо. Дуй дывеса традыне льдины шхуна пиро морё. Не сатаки мореходы удыкхне сави-то пхув и остроконечна берги.

А, галёв адава сы острово Груманто, - Ген карик амен затрадыя.

Саре промышленники сыс адяке закхиныне буряса, со на тердыне пре гера.

Химково закамья те подджял ке пхув и те дел пескиренге товаришшенге те откхинёл. Ёв взрипирдя, со про Груманто бут берша ангил одова пролыджине зима мезенска китоловы, ёне скерде одой песке кхер. Коли Химково пхендя товарищенге, со ёв камел те заджял пре пхув, саре обрадындлепе. Не Химково на джиндя, кай тердо мезенсконе китоловоненгиро кхер. Лёды на подмекенас те подджяс ке брего. Ко брего ачьяпе бутыдыр километростыр.

-Не, чявале, - пхендя Химково, - туме аченпе пре ладья, а ме лава песа манушен и джява пре брего, породава кхер. Сыр латхаса, адяке рисёвава ке туме, и понабут ласа те прокедаспе ко брего.

Химково лыя песа чявес Ванос та дуен матросен – Степанос Шараповонес и Федорос Веригинос. Ёне лыне песа карыдын, порохо пре дешудуй заряды, товер, тыкнинько пирори, яржо, чюри, набут кирки, ягитко, собы те керес яг, и гыне пре острово.

Бут ёне псирде пиро лёдо. Дре дром треби сыс те ракхеспе, соб те проперес дре паны. Догыне ке брего. Ни екх древо, ни екх кустико, екх бар, та ив, а пре проталины кренцо мохо. Прогыи пиро брего версты штар, Химково и лескире товаришши удыкхне пре паш розрадо кхер. Пашыл кхер сыс стходе кашта. Дивоса сыс пре адава муло острово те дыкхес манушитко жыльё.

Вгыя Химково дре кхер. Дре екх венгло сыс боворо, кердо е глинатыр, дре вавир – сыс нары (пасибнорья).

Степано Шарапово и Фёдоро Веригино яндле кашта и росчюде яг. Чюде пре яг котло паны, замекне одорик набут яржо. Похане адасави зуми. Побешне набут. Гыне пале, ке пескире.

-Оке даса рада амаренге, - пхендя Химково. – Дре кхер тховаса насвален, састале (здорова) аченапе пре ладья. Треби авела те породес, нане-ль кай адай морженгире штете, отенчя заласапе и промыслоса. Пиро дром удыкхне промышленники оленёс. Оленё дживела бутыр сарестыр дре тундра, пре Мурмано и дре Северно краё, не вавир моло поперлапе и пре островы.

-Те на подмарес-ли оленькос? – пучья Шарапово Химковонес.

-Аи, шукир бы сыс! Змекпэ-ка дро овраго, пиричин леске о дром.

Шарапово попрастандыя дре овраго. Бут марде ничи на сыс шундло.

Не надур амендыр роздыяпе марибе карадынятыр, а паладава пошундяпе дуратуны Шараповонескири годла.

Химково, лескиро чяво и Веригино гыне дре овраго и дре дурипе удыкхне Шараповонес.

Ёв кхардя лен стадяса, а пре ив надур лестыр сыс пашлы оленьё туша.

Пирдал паш мардо оленёс роскерде. Мас росчиндле пре штар котера. Ёне масеса гыне ке брего.

Сыгес ёне догыне ке одова штето, катыр гыне те роден кхер.

-Чявале, а ладья амари нане душло, - трашанес пхендя Химково.

-А карик же ёй кердяпе? – пучне лес спутники.

Лёдо ке брего тоже на сыс. Газдыяпе западно балвал, балвал отлыджия лёдо и кхетане ленца утрадыя, галёв, ладья или ладья сыс ростасады лёдоса и гыя тел паны.

Екх машкир ледяна пустыни

Пре морё на сыс ни саве ладьякире шперы. Бут времё тырдыне ёне пре брего и дыкхне дре туманно дурипе менькаса.

-Сыр же те явес? – пхендя Степано Шарапово.

-Приявелапе те дживес пре острово и те дужакирес бахт, - коли авела саво-нибудь промыслово судно, - пхендя пхурыдыро Химково и илеса чюнгардыя пре пхув.

-Дыкхно, со аменге треби те дживас пре нево кхер, - закамья те подсал терно Химково.

Не ни кон на засандяпе. Дре каждо ило «мыцы харуде». Дывеса гыне ке шылалы осень и на сыс надея про одова, со дре адава времё пре дуратуно Груманто заджяла саво-нибудь промыслово судно.

Штарджине гыне пхаре дёса дре кхороро. На шукар пролыджине ёне перво рат пре пустынно острово. Никон лендыр перво рат на засутя. Кажнонес рикирде соибнастыр пхаре думы. Раны злокоса Химково газдыя товаришшен и пхендя:

-Треби те скедаспе пре зима. Треби те скедес кашта. Пре брего сы пхаля. Треби те скедес сыр можно бутыдыр, а то аме бикаштенгиро зимаса замразёваса. И треби инке те дес дума ваш хабе.

Саре штарджине гыне пре брего и прилынепе те тырден кашта ке кхороро. Кажно дывес выджянас ёне пре буты, а Степано Шарапово псирдя те марел оленен. Леске удыяпе те умарел деш оленен. Мас ленгиро зачюде дро ив, и е цыпатыр керде песке тате тыраха и одеялы.

Сыгес саро порохо выгыя. Пре охота те джяс на сыс соса. Саре задуминдлепе.

-Сыр же те явес? – пучья Шарапово.

-Сыр нибудь продживаса, - пхендя Химково.

Сыр-то екхвар пре брего латхне пхал саструне нанглоса (крючкоса) и баре гвозденца. Крюко гыя ленде пале чёкан (молотко). Розмарде леса гвозди, керде лендыр наконечники ваш копьи, и лынепе ленца те псирен пре песценде.

Авья августо, а леса и мразы. Гыя ив. Тэрдыя зима. Дывеса джянас екх пале екх. Не сыго прогыне и кротка дывеса. Ачья сплошно рат.

-Адай и свенки саре забистреса и гиныбе дывесенге нашавеса, - пхендя сыр-то Веригино.

-Саве адай свенки! – пхендя Химково.

Екхвар Веригино закамья те керел календарё. Ёв кердя чюрьяса пре кашт зарубки и кажно ефтытко зарубка кердя буглыдыр. Адале бугле зарубки банге те сыкавен «Воскресеньё».

-Инке саво адава рендо, Фёдоро, - пхендя Химково, дыкхи, сыр Веригино керла пескиро «календарё». – Аме акана змардямпе дре гиныбе дывеса. Не и сыр ту леса те отчювес пре пескиро календарё дывеса, коли ке само марто лела екх калы рат бидевысенгиро?

-Аме сыр ласа те пасёвас, ме пре зарубка трушыл чювава, адава сыкавела, со дывес прогыя.

-Не, не кер.

Екхвар «дичь», кокори явья ке охотники. Сырто ратяса пашыл порта пошундяпе шорохо. Сыгес порта лыя те пхадёл. Кон-да камья те поперел дре кхер.

-Ада рыч, чявале! – пхендя Химково. – Ленпе сыгыдыр пало копьи!

Саре сухте пасибнырьендыр, заухтылде каштуне копьи, а кокоро Химково лыя товер.

-Не, чявале, на трашан! Сыр тольке рычё протырдела шеро дре порта, Марен лес копьенца. Зорьякиренпе те запотравес дурыдыр дре кирло.

-Кераса.

Химково захачкирдя яг, собы сыс душло дре кхер, и саре тердыне паше порта. Рыч сыс уже дре сенцы. Ёв подгыя ке порта и лыя геренца ла те пхагир. Пирдал мента рыческиро шеро сыкадыя дре порта и адай же трин копьи екхатыр вчиндлепе дре рычесте. Дре адая же мента кокоро Химково лыя те чингир рычес товереса.

Рыч на дужакирдя адасаво прилыибен и дре перво мента тердыя, не адава сыс пре сави-то мента, а пал лате рыч чюрдыяпе дре кхер, саре трин копьи пхагирдепе и рыч обухтылдя Шарапавонес. Не кокоро Химково на сутя. Ёв забестя рычёске пре думо и саре зорьятыр росчингирдя леске шеро товереса. Рыч пыя, и охотники домарде лес.

-Аке туке и гостё авья – проракирдя Химково, а кокоресте пре чекат кхамлыпе сыкадыя.

-Шукир со дре времё роспхарадян леске шеро ,- пхендя Степано, - а то рыч зоралес стасадя ман.

-Не аке акана аме и масеса, - посандяпе Вергино.

Е рычёстыр злыне теле цыпа. Мас росчингирде пре котера. Коли чингирде мас, охотники поддыкхне, со жылы е рычесте древан зорале и локхес росчиненапе пре отдельна волокны.

-Адале жылендыр можно те керес тетиво, - проракирдя терно Химково-чяво.

-И адава рендо, - пхендя дад.

Марибе рычеса сыс ваш саренге штарджиненге сыр свенко. Тырдыя полярно зима. Рат и дывес тердо сыс калыпе. Пре охота те джяс нашты сыс. Мразы тердыне адасаве, со фано заухтылла. Чёроре мореходы беште сыс саре дывесенца дре кхер. Ёне зачюде кхер саре стронендыр ивеса, собы сыс татыдыр. Дре кхер, коли на сыс яг, сыс древан тёмно. Адяке бисветоскиро и пашле сыс штарджине пре пескире пасибнорья, учякирде олененгире цыпенца.

Саре камне те дыкхен пэскирен. Думиндле пал адава, поперна-ль ёне кхере. Пхарес сыс те дес песке надея. Бари менька обухтыллас сарен.

Никон на джиндя, кицы чёна дживена ёне пре острово. Марде ленде на сыс. Дре адале берша берша ада сыс редкость. Кхам на сыкадыя пре болыбе, пхерде дывеса терды рат, ачьяпе только екх, те пасёс те совес. Коли те пасёс на камьяпе, кон нибудь уштелас, розлыджялас яг, карадя хабен. Уштенас – поханас, невес пасёнас. Адяке и гыне дывеса.

Екхвар Степано Шарапово гыя аври кхерестыр. Пирдал мента ёв впрастандыя дре кхер.

-Чявале, сыго кхаморо сыкавелапе, пре восходо болыбе лыя те парнёл.

Сыго выпрастандыне е кхерестыр и лыне те дыкхен дре восточно строна. Одой чячё кало болыбе сыс набут парныдыр, сыр дре вавре штете. Кажно дывес дыкхне, сыр болыбе пре востоко тердёла парныдыр. Екхвар дре дурипе сыкадыя кхамитко краешко. Не пирдал набут менты кхам загыя пале, и дре ледяно пустыня невес ачья тёмно.

Пре вавир дывес ангил морё сыкадыя паш кхам, а инке пирдал набут дывеса учес, дленго прорикирдяпе про болыбе.

- Не пшалоре, зима пролыджиям, - пхендя Химково.

Саренде пре якха сыкадыне ясва. Чюрдынепе те облен екх екхес.

Не ни кон е штарджинендыр на джиндя, саво джяла чён и кицы проджиндле ёне пре острово.

Кажноне дывесеса кхам газдыяпе са учидыр пре болыбе и штетенца пре кхам ив лыя те зджял. Сыгес пре проталина сыкадяпе мохо. Пре острово приурняндыне папиня и гагары. Лыне те прастан песцы. Химково и лескире товаришши лыне те псирен пре охота.

Пашыл копьенца Степано Шарапово кердя инке луко. Пре брего ёв латхья елово корнё, обкердя лес чюрьяса, а тетиво кердя е рыченгире жылендыр. Керде стрелы наконечникенца гвоздендыр.

Адасавенца первобытноне оружыёса ленге удыяпе те умарес бут оленен и трине песцен. Лачё оленьё мас дыя ленге зор, и ёне лыне те псирен пре брего пало кашта. Пало дленго зима ёне схачкирде бут кашта.

Дре скедыбе кашта – ёне надеяса дыкхне, сыр роскерлапе лёдостыр морё. Кажно дывес дыкхне ёне, те на сыкавелпе –ли пре морё промыслово судно, савеске бы ёне дыне те джинес ваш песке.

Не дывеса проджянас, а нисаве судны пре морё на сыс душло. Адяке дре дужакирибе прогыя саро лынай. Не сыго кхам загыя, газдынепе мразе и ивитка балваля. Авья вавирто зима.

Е менькаса невес запхандлыне штарджине дре пескиро пхуранинько кхероро, невес потырдыяпе дленго, калы рат