Кыдз гöтрасис да иньыскöт олiс паша

Мойд



Öтiк деревняын, ылын или матын, öтiк айлöн да мамлöн чужис зон, кöдö нимтiсö Пашкаöн. Öтiк зон сiдзкö быдмис аймамыслöн, быдмис бура, быдöс, мый вöлi— вöзабыдтöмлö. Быдмис Пашкаыс, сыбöрын пондiс велöтчыны школаын. Колö висьтавны, что велöтчис не öддьöн бура, кöр велöтiссес эз ошкö и эз видö. Школа бöрсянь зонкаыс эз мун овнытö городö, а кольччис уджавны колхозын, кытöн уджöн асьсö эз дойд: мунас уджавны и кыдз брынгас луныслö... Важся кадö этадз уджалiсö бы, позис бы тшыгйöн кувны, но Пашка öтiк лун эз тшыгьяв, сёйис пöт, кöр бригадирыс вöлiасланыс, кöда, уджав кöть эн, гижис наряддэз, и деньганас эз бöбöт: керан кöть он, сё ни босьтан. Зонкалö гленитчис уджыс и оланыс деревняын, позис бы этадз кувтöдз овны да ошшасьны оланнас, только колiс бы адззыны чож да кодя невеста, гöтрасьны сы вылö и одзлань овны, но деревняын öння кадын гöтрасьны лоис некин вылö: нывкаэс, кöдна быдмисö, пышшисö городö, кыдз томмесö гусялiс жаднöй варыш — öтiкö пышшöтас да мöдiк колö, мöдiкыс бöрсянь öшас куимöт, и кöть тэ варышыслö мымда козьнав, пыр тшыг, пыр шуö: «Вай! Эшö вай!»

Абуöсь деревняын нывкаэс, кöть нiйö мымда быдтасö, сэтöн жö Пашкаыслö колö сэтшöм невестаыс, кöдакöт эз бы вöв стыд отир син одзö мыччисьны, кöда бы кужис уджавны и жöниксö пантавны да кольлавны. Абу невестаэс гортын и абу.

Дыр я, недыр я и пондiс кывсьыны, что не мöдiк царствоын-государствоын, а кытшöмкö деревняын эм пö нывка, и мед нывкаыслöн айыс абу царь, но кытшöмкö пö начальник кодь, и мамыс нинкöммез оз жö новйы, сьöкыта оз уджав, и бытьтö бы отирыс богатöйкодьöсь. Сiдзкö...

— Ветлiн бы, Паша... Видзöтчин, юасин да висьтасин и эз я бы, еныс сорöн, мыйкö пет, — Пашкалö баитö мамыс. — Тэнат мывкыдöн бы туйис кöть кытшöм сарлiсь босьтны нывсö.

— Мам, эн модь! Асьным тöдам, — мамыскöт пиньгисьö зонкаыс, ачыс быль эд лöсьöтчö туйö: пасьтасис, кöмасис, кыдз медбур жöник — любо видзöтны, юыштiс винаок, мед лоны смевжыкöн, петiс гортсис и иньдöтчис кузь туйö.

Подöн эд зонкаыс мунiс, кöр думайтiс, что басöк нывкаыс олö матiсь деревняын, но öння кадын кытöн бы матiсь деревняыс, кöр матiссес разсисö, дзик керкуэсö и отирсö сёйис лёк ош, ылынжыкын олöны старик да старуха, талун-ашын лолалöны, гроб пöввез ни заптöмась, эшö ылынжыкас петух китöстiс да öтiк мöс бакöстiс, но невестаыс эз пантась, и зонкаыслö колiс шагнявны одзлань. Тальö туйсö Пашкаыс одзлань, сьöлöмыс кыскö нывка дынö, и сэтöн то пантасис куим пиня старуха — беддясьö. Здоровайтчис зонкаыс пöрисьыскöт, пондiсö сёрнитны öтiкö да мöдiкö, ошшасисö, юасисö да висьтасисö, и Пашаыс висьталiс, что мунö кошшыны невеста.

— Мыся, менö он я босьт?! — старухаыс веськыта юалiс зонкаыслiсь. — Ме эшö, ой-ой! Кöмкöт-паськöмсö кужа вочнытö и похлёбкасö пуа, а томмессянь мый?.. Только бокат узьлыны.

— Ог, баб, гöтрась тэ вылö, — веськыта пöрисьыслö висьталiс Пашаыс. — Тэ талун ловья, ашын кулан. Мый менам сэк лоас?

— Сiдз, — сэтöн горöтчис пöрисьыс. — Лöсьöтчи овнытö сто год бы да важми ни: рожабаннэзö чукрассисö, лыэзö чорзисö, пиннезö киссисö, а тэныт иньыс колö лэчыт пиня! Мыись-мый, курччöвтiс и — эм, сэсся керны нем! Веськыта висьтавны, зонка, тöда öтiк нывкаöс, только... Айыс Вöрдядьыс кодь жö мывкыднас: кöсъяс да он босьт, вöзъяс да вунöтас, а мамыс мывкыднас сора — кодя и лёк, но и нывкаыслöн синнэс вирдалöны...

— Кысь тэ сымдасö, баб, тöдан? — юалö пöрисьыслiсь зонкаыс. — Абу я тэ яг вывсис бабыс ни?

— Быль! Яг вылiсь бабöн и шуöны, но и ась шуöны: кылыс не пыжьян, оз мöртчы, öмсиныс петас да асьнысö жö вöтас — шуиссесö отирыс оз любитö...

— Сiдз, баб, но эн эд висьтав, кытöн нывкаыс олö.

— Нывкаыс... — пöрисьыслöн öмыс риз видзö. — Веськыта мунан, шульгаланяс чукыльтчан, веськыта кивыльтан, сыбöрын бöра веськыта да веськыта и адззан невестаыслiсь деревнясö.

Пашка янсöтчис пöрись морткöт, медодз мунiс веськыта, сыбöрын чукыльтiс шульгалань и бöра пондiс кивыльтны веськыта, сэтöн и пантасис Зелёнöй Змейыс — люкасисö оча-паныт. Змейыс бöжсö кыскö муыс бердöт, пиннес гер, синнэс дульсмöмась, öмыс осьта и, кыдз ловзисяс, сiдз гуттэс и пезьдöны, номмес лэбзьöны да киссьöны, и Пашкаыс невна коккес вылiсь эз усь, кыдз Змейыс ловзисис зонкаыслань да пондiс ошшасьны:

— Гöститны, зонка, деревняас бöра ветлi. Ох и гöститi! Джын деревнясис отирсö коккезныс вылiсь ольсалi! Ниль пöрис том и пöрись, садьтöг узьöны, хе-хо-о-о! Он я тэ мекöт понды дружитны? Öддьöн эд ме ёртыс лоа кодя! Öтпыр шедлан öтiк пызан сайö, гленитча и сьöлöмыт пыр пондас кыскыны ме дынö, хе-хо-о-о! Но кыдз?

— Некöр, — висьталö зонкаыс.

— Мый лоис? Мыля некöр?

— Невеста кошша.

— Гöтрасьны кö пондан, эн вунöт свадьба вылат корнытö. Метöг, ёрт, öння кадын öтiк свадьба оз чулав.

«Колан тэ...» — сьöлöмыс гудыртчис зонкаыслöн, кöр Зелёнöй Змейыс лолалö сэтшöм вина дукöн, что юрыс бергöтчыштiс.

— А невестаыт, — одзлань зызiс Змейыс, — нач ни матын: чукыльтан эшö öтiк чукыль и локтан. — Бöра лякасис басниöн, медбы гöститöтны Пашкасö. — Пешлан, бат, менчим юансö, а?

— Ог, — висьталiс Пашкаыс и иньдöтчис одзлань, тэрмасис — бöрас дзар эз кер. Мунö и видзöтö — паныт локтö дед. Тошыс гöгöдззас, ачыс мусяняс сизим вершок сувда, но чож, чышкö-мунö. Здоровайтчисö. Дедыс пондiс юасьны кытчö мунö да мый бы керö. Зонкаыс и висьталiс, что невеста кошшö, басöкö, бытшöмö, сэтшöмö, кöда уджа, смев, кужö любитны.

— Да тэ мый?! — дедыс чисто повзис. — Кысь тэ öння кадын сэтшöм невестасö адззан? Кытöн чожжес быдмöны? Эстöн деревняас эм öтiк нывка, но сэтшöм, что ме бы тэ местын сизим верста ордди, — сьöкыта лолалiс, видiс олансö, баитiс: — Быдöннысö ни Зелёнöй Змейыс тшыкöтiс, кыдз зараза: локтас деревняас, быдöнныс бердö кутчисьö, пешлö мывкыддэзнысö, кöть старик, кöть старуха, кöть жöник, кöть невеста — быдöнныс Змейыскöт тöдчöны и сылö сетчöны, быль! Но ачыт тöдан, кага, ачыт тöдан... Ме, кывзы, туйтö ог поперегав. Ветлы, видзöтчы да лöсьöтчы... Ме вот оськöвта гортö, и сэсся, натьтö, деревнясö понда орддьыны.

— Кин тэ сэтшöмыс, дед? — дедлiсь юалö Пашкаыс.

— Ме кин? Суседку ме, кага. Видзöт, олi, олiöтлаын отиркöт, öтiк керкуын водiи чеччи, но медбöрья кадö оланыс сiдз курзис, что пышши деревнясис, поздiси вöрас и ола кытчöдзкö мед и абу жö вöрас чöскыт овнытö бы: то зэрö, то ойтöв вижгö, то тöвнас лым усьö. Но мый керан? Нем он кер. Судьба сэтшöм. А тэ эн пов. Ветлы, видзöтчы, оз я гленитчы нывкаыс, он я гöтрась.

Янсöтчис Паша учöт дедко-суседкукöт, кöдö оланыс репöтiс гортсис-керкуись, шаг-мöд шагньöвтiс, видзöтö: паныт локтö пон, юрсö öшöтöм и турьялö, кыдз код.

— Шарик, кытчö мунан? — юалö поныслiсь.

— Ой-ой! — кивзыштiс Шарикыс. — Эн ни бы, зонка, юась, — и пондiс горзыны да норасьны. — Гортын нач оланыс эз ло. Зелёнöй Змейыс быдöннысö тшыкöтiс. Неделя ни джын деревняыс садьтöм. Ниль пöрис отирыс. Менам хозяинö сэтшöм жö, оз верд, а ыксö: «Шарик, котöрт и вайöт Зелёнöй Змейсö! Вайöт, кöин мульöс!» Вот и вöтча зараза сьöрö да тшыг увья коккезö оз кывзiсьö. Эн я тэ пантав врагсö?

— Панталi, — Шариклö висьталiс Пашаыс. — Тай вöлiошшасьö, бытьтö пö отирсö пöрöтöма коккезныс вылiсь.

— Сiдз, — синваэсö чышкö Шарикыс да иньдöтчö одзлань — вöтчö Зелёнöй Змейыс сьöрö, а Пашаыс оськöвтiс деревняныслань.

Чожа пондiсö тыдавны керкуэз, чожа пантасисö мöссэз, куканнез, порссез, курöггез, кöдна чукöртчöмась öтлаö и горзöны, кöть пеллез тупкав, и кыдз подаыс казялiс зонкасö, сiдз и пондiс öтiк öмись норасьны:

— Вашöт миян дынiсь Змейсö! Отсав! Или нуöт сьöрат, то олан эз ло: Змейыс нач тшыкöтiс хозяиннэзнымöс да хозяйкаэзнымöс, некин миян вылö дзар оз кер, кöть тшыгöсь, кöть пöтöсь, кöть талун жö кöиныс сёяс быдöннымöс, спасибо висьталасö, что ог лоö.

Мый сэтöн керны? И Пашаыс висьталiс подаыслö, что быль нуöтас врагсö сьöрас да заргас кытчöкö пыштыö, ась сэтчин сiя и кулö.

— Спасибо тэныт, кодя морт! — Пашалö шуöны баляэс, мöссэс и мöд подаыс. — Мед еныс тэныт козьналö здоровье, да дыржык овны!

Зонкаыс янсöтчис подаыскöт, локтiс деревняö и адззö, что эстöн отирыс быль шогалö: том и пöрись пöрöмась коккезныс вылiсь, некинлö и нем оз ков, некинлöн и нем понда сьöлöммезныс оз висьö, мед и кадыс зэлыт — страда, колö бы керны турун, но уджавны некинлö, только öтнас басöк нывка, чож да басниа, панталiс зонкасö, шуис:

— Еныс тэнö, Паша, вайö! Чожажык гöтрась ме вылö, то Змейыс корасьö, кöть синнэзас сьöлав, нуöтö бы инь вылö, но меным сэтшöм мужикыс оз ков, а тэ колан!

— Сiдз, — нывкаыслö шуö Пашаыс. — Гöтрася тэ вылö, басöк Елена! И пондам ми тэкöт овны да уджавны, лоам богатöйöсь да счастливöйöсь.

— Лоам богатöйöсь да счастливöйöсь! — невестаыс öшöтчис жöникыс голя бердö, пыма окалiс.

И зонка да нывка — жöник да невеста иньдöтчисö овны зонкаыс гортö, мунiсö сiя жö туйöт, кыт нывкаыс дынö локтiс зонкаыс. Мунiсö гортö жöник да невеста, Пашаыс кыдз бы деревнясис пышшöтiс невестасö, и кольлалiсö нiйö деревня сайын мöссэз и куканнез, баляэз и порссез, быдöнныс горзiсö нывкаыс понда, мыля сiя öтнас эз сетчы Зелёнöй Змейыслö, öтнас мымдакö вердiс и юкталiс подасö, а öнiколис вöрö, но мый керан? Сэтшöм олан, и подаыс Еленалö да Пашалö кöсйис бур олан, счастье, быд мöсыс, порсьыс и баляыс лöсьöтчисö локны томмес ордö да овны öтлаын. Туй вылын пантасис и Зелёнöй Змейыс, сiя бöба серöмтчис да шуис:

— Эй, басöк Елена! Мыля ме сайö эн мун?! — содтiс: — Видзöт... Ме тэ бердiсь ог мездöтчы... — И öшис син одзись, а Пашаыс думайтiс, что ассис невестасö некинлö оз сет, ась только пондылö Змейыс, мед кутчисьö, сэк вöлись адззылас. Эна думаэзöн зонкаыс невестасö вайöтiс гортö. Ашынас жö томмес чукöртiсö свадьба. Локтiсö керку тыр гöссез, эз ештö пуксьыны пызан сайö, кыдз оссис ыбöсыс и керкуö пырис юасьтöг Зелёнöй Змейыс, ыбöссянь веськыта пуксис пызан сайö и пондiс сёйны, и пондiс сёйны. Сэтöн гöссес мый и лоисö, быдöнныс дзик бöбмисö, вежсис мывкыдныс: кöда мортыс бытьтö пöрис чёртö, кöда вöлiгöсь да лоис порсь, маммез пöрисö куканнезö, воннэз лоисö дзик поннэз, томмез — номмез, баббез — гаггез, тёткаэз — бырöм испоткаэз, вежай — рака кай, вежань — вöркань, и вöлись пондöтчисö гажöтчыны: кöда сьылiс, кöда йöктiс, кöда арзiс, кöда горзiс,

— Их-хо-хо да ха-ха! — медодз ыкöстiс Змейыс, чеччöвтiс пызан сайись джодж шöрö и пондiс зiльны-тiльны джоджыс шöрын. Сьöрас чеччöвтiсö мужиккез и инькаэз, томмез и пöриссез, воннэз и поннэз, каннез и куканнез, пондiсö йöктыны — мыччавны мывкыддэзнысö. Йöктiс отир, бытьтö мезмис кытiськö пемыт гуись, и йöкты бы да сьыв — гажöтчы бы пöт, кöр сы понда и эм свадьбаыс, но отирыс эд бöбмисö: кöда пильскис иньыслö да нырöмас вачкис, кöда брынгис моньлö да веськыта чужöмöдззас, кöда сьöвзис, кöда горзiс, кинлöнкö гудрасис сьöлöмыс, кинлöнкö потласис-висис юрыс, кинкö кутчисис ёртыс морос бердö. Керкуын топ бергалiс турунъюр, и Зелёнöй Змейыс вöлiрадся-рад, ыксiс: «Чожöсь, отир! Сiдз и колö, ха-ха да хи-хи! Гажöтчö, челядь! Свадьбаыс Пашаыслöн лоас öтпыр! Мымда гажöтчат, сымда и мекöт тöдчат!»

Эта öддьöн эз гленитчы Пашаыслö, сiя лöгасис Змейыс вылö, лöсьöтчис вашöтны бы керкусис, но отирыс лоис Змейыс дор, быд морт пондiс ыксыны: «Паша! Тэ мый керан?! Мыля миянлiсь меддона да медгажа ёртнымöс вашöтан?! Э-э-э, зонка! Сiдз эд оз туй, öння кадын Змейыстöг öтiк свадьба оз чулав, сэтöн миян родным и эм — еныс кыдз...»

Кöть кыдз, кöть мый, но свадьбаыс чулалiс. Водiсö узьны жöник да невеста. Ашынас Пашаыс чеччö и адззö, что том иньыс одзалöм сiйö чеччыны, и пукалö ни пызан сайын, но кинкöт бы думайтат? Зелёнöй Змейыскöт эд, кöда пондiс ошшасьны:

— Паша, этадз узьтöннят иньтö верман эд öштыны. Видзöт, ми Еленаыскöт сёямö да юамö! — синнэс сiдз и вирдалöны, пиннес гер, сiдз бы и сёйö отирсö, сiдз бы и сёйö, бытьтö няньнас оз пöт, а Пашалöн иньыс Змейыс гöгöрын гардчö и гардчö, сэтшöм ни рад, сэтшöм рад, дзик жöникыс сайö мунöма не Пашаыс сайö, а узьöма Змейыс бокын. Гажöтчö том инькаыс да эшö куритö — тшын кайö, и эшö ошшасьö.

— Пашка, тэ меным он ни ков! Ме виль жöник бöра адззи. Видзöт жö кытшöм басöкö! Сьöвзис бы Пашкаыс — сьöлöмыс гудыртчис, но эз сьöвзьы и шы эз сет, кöр сiдз ни любитiс

Еленасö, сiдз любитiс, что иньсö пуксьöтiс ни бы енджаджö да пондiс юрбитны, кыдз енлö...

Гöтрасис сiдзкö Пашкаыс медбасöк, медчож, меддона нывка вылö и пондiс овны инькаыскöт, лöсьöтчис уджавны да добро бы гумавны, овны сiдз, мед томмеслiсь олансö некин бы эз дзуг, но видзöтö жö мый петö: медодзза лунö Еленаыс висьталiс ни, что любитö мöдiкöс...

Кыдз шуöны, гладь местаын верман падмыны и усьны, сiдз и лоис том мужикыслöн: öтпыр Змейыс иньыс гöгöрын гардчис, сыбöрын мöдöтпыр öтлаись кутiс, и, кыдз иньыс пантасьлас Зелёнöй Змейыскöт, сiдз мывкыдыс и вежсьö, кыдз абу ни Еленаыс не мывкыднас, не вывтырнас и син гöгöрыс топ йöзлöн ни — мужиксö нерö: «Эх Паша!.. Он тэ ков меным сэтшöм момотыс. Мый тэись?! Гöжöм турисис. Не окасьны, не тышкасьны. Асьтö он вермы дорйыны. Вöлiн бы кодя мужик, мырддин бы менö Зелёнöй Змейыслiсь, а тэ öмтö осьтiн да видзöтан... И кольччы, а ме муна Змейыскöт!» Шуис и абу ни Еленаыс. Öтiк лун гортын абу, мöдiк абу, куимöт лун гортын оз мыччись, а Пашаыс эта коста тöждiсьö — сьöлöмыс сiсьмö и косьмö. Мöдiк бы сэтшöм иньыслö, тьфу! Сьöвзис и абу, а сiя сьöвзьыны Еленаыслö оз вермы, сiдз кыдз иньсö любитö, видзчисьö, и, видзöтан кö, иньыс локтö гортö, бытьтö шедлöма пемыт вöр шöрö, и инькасö ош нярьялöм да гыжьялöм: рожаыс пыктöм — синнэс дзуз видзöны, юрсиыс пашмöм, голосыс сибдöм — абу бытьтö морт, кöр эшö паськöмыс лешки-вошки, то бырöм, то косьöвтчöм, и куритö.

— Кытöн вöлiн?! — кыдз лöгасьö бы Пашаыс. — Мый керин?!

— Кытöн вöлi, сэтчин абу ни. Мый кери, ачым тöда, и тэ эн шыась, ме тэнö ог любит! Любита Зелёнöй Змейсö!! Мый тэ менö эта понда керан? Виян или... — нерö эд, кывсö мыччалö, — он вий, Паша! Законыс абу тэ дор!

Сiдз: Пашаыс иньыстöг оз вермы овны öтiк лун, сэтöн жö лöгыс петö иньыс вылö, мыля сiя вöтлiсьö Зелёнöй Змейыс сьöрын, оз вермы вежöртны, мыля иньсö вермис смилитны Змейыс.

— Висьтав, Елена, — Пашаыс ыксö иньыс вылын, — мыля сiдз?!

— Любо, вот и любита! — бобгö Еленаыс.

Лун-мöд олö мужикыскöт, а сыбöрын бöра öшö, бöра гортас абу лун да мöдiк, локтö и видö мужиксö, бытьтö Пашаыс оз вачкись мужик вылö, сыкöт оз понды овны, а Пашаыс модьö: «Елена, мыля сiйö любитан?»

Олiсö этадз том гозъя — мырсисö. Пашаыс сё надейтчис, что иньыс кежас Змейыс дынiсь, вунöтас сiйö, пондас овны гортын, но öтпыр Еленаыс öшис гортсис и сэсся эз лок, мöдiккез шуисö, что инькасö гусялiс Змейыс, куимöттэз лёбисö, что Еленасö адззылöмась ылiсь деревняын, йöз отир коласiсь и бытьтö пö шатласьö пон моз, вердчö сiйöн, кин да мый сетас. А Пашаыс олö гортас, тöждiсьö, да ой и лун видзчисьö иньсö.