1161772304_Tipikon

+ И преподобнаго отца нашего сергиа игумена, радонежскаго чудотворца.

Совершается собор его и во обители его и во храмех, в прочих же полиелей.

Тропарь, глас 4: Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником: темже и вселися в тя пресвятый дух, егоже действием светло украшен еси. но яко имеяй дерзновение ко святей Троице, поминай стадо, еже собрал еси мудре, и не забуди якоже обещался еси, посещая чад твоих, сергие преподобне Отче наш.

Кондак, глас 8. Подобен: Взбранной: христовою любовию уязвився, преподобне, и тому невозвратным желанием последовав, всякое наслаждение плотское возненавидел еси, и яко солнце отечеству твоему возсиял еси: тем и Христос даром чудес обогати тя. поминай нас чтущих пресветлую память твою, да зовем ти: радуйся, сергие Богомудре.

26. (+ Преставление святаго апостола и евангелиста Иоанна богослова.

Тропарь, глас 2: Апостоле христу Богу возлюбленне, ускори избавити люди безответны, приемлет тя припадающа, иже падша на перси приемый: егоже моли, богослове, и належащую мглу языков разгнати, прося нам мира и велия милости.

На Велицей Вечерни, по обычном псалме, стихословим, блажен муж, 1-й антифон. На Господи воззвах, стихиры на 8, глас 1, подобен: небесных чинов: Зритель неизреченных откровений: Слава, глас 2: сына громова: И ныне: Прейде сень: Вход. Прокимен дне. И чтения 3: 1-е, Соборнаго послания иоаннова: Возлюбленнии, аще сердце наше: 2-е, Возлюбленнии, аще сице: 3-е, Возлюбленнии, аще кто речет, яко люблю бога: На литии, стихира храма: Таже апостола, глас 1: Реки богословия: Слава, глас 4: Возлег на перси: И ныне, богородичен, глас тойже Со отцем и духом: и обычныя молитвы литии. На стиховне стихиры, глас 4, подобен: Званный свыше: с припевы их. Слава, глас 6: Апостоле христов: И ныне: Творец и избавитель: На благословении хлебов тропарь, глас 2: Апостоле христу богу: дважды, писан на малей вечерни. И Богородице Дево, единожды. И буди имя господне, с пением, трижды. псалом 33: благословлю Господа: Конец: Не лишатся всякаго блага. и чтение. На Утрени, на Бог господь, тропарь апостола, дважды: Слава, и ныне: Вся паче смысла: и обычныя кафисмы. И седальны апостола, с богородичны их: и чтения. По чтении же даются свещи братии. Полиелей, и седален, глас 8: Возлег на перси: дважды. Слава, и ныне, богородичен: небесную дверь: и чтение: Степенна, 1-й антифон 4- го гласа. Прокимен, глас 4: Во всю землю: Стих: небеса поведают: Всякое дыхание: евангелие Иоанна, зачало 67: явися Иисус учеником своим, востав от мертвых: По 50-м псалме, Слава, молитвами апостола, милостиве, очисти множества согрешений наших: И ныне: молитвами Богородицы: Помилуй мя Боже: Таже, стихира, глас 2: богослове девственниче: Канон Богородицы, со ирмосом на 6, 2-го гласа: и апостола два канона на 8: един, глас 2: другий, глас 6. Катавасиа: отверзу уста моя: По 3-й песни, седален апостола, глас 8, дважды: Слава, и ныне, богородичен: и чтение. По 6-й песни,

Кондак, глас 2: Величия твоя девственниче кто повесть? точиши бо чудеса, и изливаеши исцеления, и молишися о душах наших, яко богослов и друг христов.

И икос, и пролог. На 9-й песни, паки вжигают свещи братия. По 9-й песни, светилен апостола: Слава, ин: И ныне, богородичен. На хвалитех стихиры на 4, глас 8. Подобен: о преславнаго чудесе! Слава, глас тойже, самогласен. благовестниче иоанне. И ныне: владычице, приими молитвы раб твоих: Славословие великое. По трисвятом, тропарь

апостола. Слава, и ныне, богородичен: Вся паче смысла: ектении, и отпуст. И поем стихиру самогласну святаго, юже хощет екклисиарх. И исходит иерей с кадилом, предыдущу ему светильнику, кадит на аналогии икону святаго апостола, и отдав кадило стоит о десную страну аналогиа: и приходит игумен ко аналогию, и творит два поклоны, и целует икону святаго апостола. И по целовании един поклон: и взем стручец на то устроенный, помазует себе от кандила святым елеем крестообразно, на челе своем: и братия подобне целует икону святаго, игумен же помазует святым елеем иереа, и прочую братию. По помазании же святаго елеа, поем час первый. На 1-м часе, тропарь и кондак апостола, и бывает конечный отпуст. [Смотри] [Сице помазание бывает всегда, и во вся праздники великих святых, в нихже бывают бдения.] На Литургии, блаженна от канона 2-го гласа, песнь 3- я, на 4: и 8-го гласа, песнь 6-я, на 4. По входе, тропарь храма Христова, и Богородицы, и апостола. Храмов же святых, тропари и кондаки не глаголются. Посем кондак храма Христова. Таже, Слава, кондак апостола: И ныне, храма Богородицы. Аще ли несть храма Богородицы: И ныне, храма Христова. Аще ли несть храма Христова и Богородицы, глаголем тропари сице: Тропарь апостола: Слава, кондак его: И ныне, Предстательство христиан: Прокимен, глас 8: Во всю землю: Стих: небеса поведают славу божию: Апостол, Соборнаго послания иоаннова зачало 73 от полу: Возлюбленнии, бога никтоже виде: Аллилуиа, глас 1: Исповедят небеса чудеса твоя, Господи. Стих: Бог прославляемь в совете святых. евангелие Иоанна, зачало 61: Стояху при кресте Иисусове: Причастен, Во всю землю.

27. святаго мученка каллистрата и дружины его.

Стихиры октоиха 3: И святых 3, глас 8, подобен: о преславнаго чудесе! Слава, глас 4: Прежде честнаго креста: На стиховне октоиха. Тропарь, глас 4: мученцы твои Господи: Сего месяца в 20-й день. На Утрени, оба канона октоиха: И святых на 4, глас 8. По 3-й песни,

Кондак, глас 4. Подобен: явился еси: Всяк труд днесь церковь ныне совершающи святии, восхваляет таинственно, яко за ню страдальчествовавшия мученцы божественнии, добропобеднии, всемудрии.

Таже седален, глас 5. По 6-й песни,

Кондак, глас 4. Подобен: Вознесыйся на крест. Многообразныя раны претерпевше, и венцы от бога яве приимше, о нас молитеся блаженнии христу, память всепразднственную вашу совершающих, величайший каллистрате, со страдавшими с тобою, еже умирити паству и люди: той бо есть верных утверждение.

И икос. По 9-й песни светилен октоиха: Слава, святых: И ныне, богородичен. На стиховне октоиха.

(:. И преподобнаго отца нашего савватиа соловецкаго чудотворца.

Совершается собор его во обители его, и идеже храм его.

Тропарь, глас 3: удалився мира и водворився в пустыни, добрым подвигом подвизался еси, злостраданием и вниманием и молитвами: отонудуже и по смерти источаеши исцеления, савватие Отче наш. моли Христа Бога, спастися душам нашим.

Кондак, глас 2: Житейския молвы отбег, вселился еси в морский остров, мудре, и крест твой взем, христу последовал еси, в молитвах и во бдениих и в пощениих, злостраданьми

плоть твою изнуряя: тем был еси преподобных удобрение: сего ради любовию память твою празднуем, преподобне савватие, моли Христа бога непрестанно о всех нас.

28. + преподобнаго отца нашего и исповедника харитона.

Вечер, блажен муж, 1-й антифон. На Господи воззвах, стихиры на 6, глас 4. подобен: Дал еси знамение: Слава, глас тойже, самогласен: богоносе харитоне: И ныне, богородичен: Иже тебе ради: Вход. Прокимен дне. И чтения, 3, и ектении. На стиховне стихиры, глас 1, подобен: Всехвальнии мученцы: с припевы их: честна пред господем: Слава, глас 8: Монахов множества: И ныне: Безневестная Дево: По Отче наш: тропарь, глас 8: Слез твоих теченьми: писан сего месяца в 3-й день. Слава, и ныне: Иже нас ради: И отпуст. На Утрени, на Бог господь: тропарь святаго, дважды. Слава, и ныне, богородичен. И обычныя кафисмы, и седальны святаго. И чтение. Степенна 1-й антифон 4-го гласа. Прокимен, глас тойже: честна пред господем смерть преподобных его. Стих: Что воздам господеви: Всякое дыхание: евангелие матфеа, зачало 10. По Иисусе идоша народи мнози: По 50-м псалме, стихира, глас 6: преподобне отче, во всю землю: Канон Богородицы, со ирмосом на 6, глас 2: Нетрену, необычну: И преподобнаго на 8, глас 4. Катавасиа, отверзу уста моя. По 3-й песни седален, глас 8, дважды. Слава, и ныне, богородичен. По 6-й песни,

Кондак, глас 2. Подобен: В молитвах: Насладився, Богомудре, воздержания, и плоти твоея вожделения обуздав, явился еси верою возращаемь: и яко жизни древо, посреде рая процвел еси, харитоне всеблаженне священнейший.

И икос. По 9-й песни светилен, дважды. Слава, и ныне, богородичен. На хвалитех, стихиры на 4, глас 4. Подобен: Дал еси знамение: Слава, глас 5: преподобне отче, глас евангельский: И ныне, богородичен: Славословие великое. По трисвятом, тропарь святаго. Слава и ныне, богородичен: ектении. И отпуст. И час 1-й, и конечный отпуст. На Литургии, блаженна от канона святаго, песнь 3-я, и 6-я, Прокимен, глас 6: Восхвалятся преподобнии во славе: Стих: Воспойте господеви песнь нову: Апостол к коринфяном, зачало 176: Бог рекий из тьмы свету возсияти: Аллилуиа, глас 6: блажен муж бояйся Господа: евангелие луки, зачало 24: Ста Иисус на месте равне: Причастен: В память вечную будет праведник:

29. (:. преподобнаго отца нашего кириака отшельника.

Стихиры на 6: глас 8, подобен: Что вы наречем: Слава, глас тойже, самогласен: Монахов множества: И ныне, богородичен, или крестобогородичен. На стиховне, октоиха: Слава глас 6: преподобне отче, во всю землю: По Отче наш: Тропарь, глас 1: Пустынный житель и в телеси ангел. и чудотворец показался еси, богоносе Отче наш кириаче, постом, бдением, молитвою, небесная дарования приим, исцеляеши недужныя, и души верою притекающих к тебе. слава давшему тебе крепость: слава венчавшему тя: слава действующему тобою всем исцеления.

На Утрени, оба канона октоиха: и святаго на 6, глас 8. По 3-й песни,

Кондак, глас 8. Подобен: Возбранной: яко поборника крепкаго и заступника, чтущи тя священная лавра всегда празднует летне памяти: но яко имея дерзновение ко господу, от врагов находящих соблюди ны, да зовем: радуйся отче треблаженне.

Таже седален, глас 5, дважды. По 6-й песни,

Кондак, глас 2. Подобен: Вышних ищя: Чистотою душевною божественно вооружився, и непрестанную молитву яко копие вручив крепко, ссекл еси демонская ополчения, кириаче Отче наш, молися непрестанно о всех нас.

И икос. По 9-й песни светилен октоиха: Слава, святаго, И ныне, богородичен. На стиховне октоиха: Слава, глас 5: преподобне отче: И ныне, богородичен или крестобогородичен. По трисвятом, тропарь святаго, и отпуст. На Литургии, блаженна октоиха на 4: И преподобнаго песнь 3-я, на 4. Прокимен, глас 6: честна пред господем смерть преподобных его. Стих, Что воздам господеви о всех: Апостол к галатом, зачало 113. Плод духовный: Аллилуиа, глас 6: блажен муж бояйся Господа. евангелие луки, зачало 24: Ста Иисус на месте равне: Причастен, В память вечную:

30. (:. святаго священномученка григориа, великия армении.

Стихиры на 6, глас 6, подобен: Всю отложивше: Слава, глас тойже, самогласен: Кто достойно: На стиховне октоиха: Слава, глас 6: В незаходящий облак: Тропарь, глас 4: И нравом причастник: сего месяца в 3-й день. На Утрени, оба канона октоиха: И святаго на 6, глас 4. По 3-й песни, седален святаго, глас 4. дважды. По 9-й песни,

Кондак, глас 2. Подобен: Твердыя: благославнаго и священноначальника вси яко страдальца истины, днесь вернии в песнех и песнопениих восхвалим, бодраго пастыря и учителя, григориа всемирнаго светильника, и поборника: христу бо молится еже спастися нам.

И икос. По 9-й песни светилен октоиха: Слава, святаго: И ныне, богородичен. На стиховне октоиха. На Литургии, блаженна октоиха, на 4: и святаго, песнь 3-я, на 4. Прокимен, глас 6: честна пред господем смерть преподобных его. Стих: Что воздам господеви о всех: Апостол к коринфяном, зачало 167: Братие, бодрствуйте: Аллилуиа, глас 2: священницы

твои: евангелие матфеа, зачало 103: Бдите убо: Причастен, В память вечную: (:. И преподобнаго отца нашего григориа, иже на пелшме реце, вологодскаго чудотворца: Совершается собор его во обители его, и во храмех.

Тропарь, глас 8: Любовию христовою, Богомудре, просветився, добродетельми облистал еси, и всякое наслаждение плотское возненавидев, и в пустыню вселився, в нейже вельми подвизался еси в жизни сей временней в пениих, и во бдениих, и в пощениих: сего ради и Христос даром чудес обогати тя. но поминай нас чтущих пресветлую память твою, преподобне отче григорие, и моли Христа бога спастися душам нашим.

Кондак, глас 8: христовою любовию уязвився, преподобне, и тому невозвратным желанием последовал еси, всякое наслаждение плотское возненавидев, и в пустыню вселився, в ней вельми подвизался еси. тем и Христос даром чудес обогати тя, поминай нас чтущих пресветлую память твою. да зовем ти: радуйся, преподобне григорие, Отче наш.

И святаго михаила, перваго митрополита киевскаго, и всея россии чудотворца.

Месяц октоврий,

имеяй дней 31. День имать часов 11, а нощь 13.

1. святаго апостола анании, единаго от седмидесяти: И преподобнаго отца романа сладкопевца.

Вечер, обычная кафисма: На Господи воззвах, стихиры апостола, глас 4, подобен: Званный свыше: И романа стихиры, глас 1, подобен: небесных чинов: Слава, апостола, глас тойже, самогласен: Сосуд избранный: И ныне, богородичен, или крестобогородичен: Стиховна, октоиха: И апостола стих, глас 4, с припевом: Во всю землю изыде вещание их: страстотерпческое приятелище: Слава, преподобнаго, глас 6: Первое добрых начало: И ныне, богородичен, или крестобогородичен: Тропарь апостола, глас 3: Апостоле святый: септемвриа в 22 день.

Слава, тропарь преподобнаго, глас 8: В тебе, отче, известно спасеся еже по образу: приим бо крест последовал еси христу, и дея учил еси презирати убо плоть, преходит бо: прилежати же о души, вещи безсмертней: темже и со ангелы срадуется, преподобне, романе дух твой.

И ныне, богородичен, или крестобогородичен. На Утрени, Канон октоиха, един: и апостола, глас 8: И преподобнаго глас 6. По 3-й песни,

Кондак преподобнаго, глас 8: божественными добродетельми духа, измлада украсився, романе премудре, церкви христове пречестное украшение был еси: пением прекрасным украсив ю блаженне. тем молим тя, подаждь желающим божественнаго дарования твоего, яко да вопием ти. радуйся, отче преблаженне, красото церковная.

Седален апостола: Слава преподобнаго. По 6-й песни,

Кондак апостола, глас 2. Подобен: В молитвах: В молитвах теплейший заступниче, и просящим скорейший послушателю, приими моление, анание, наше, и Христа моли, помиловати ны, единаго во святых почивающаго.

И икос: и чтем пролог. По 9-й песни светилен октоиха: Слава, апостола, И ныне, богородичен: На стиховне октоиха. Слава, апостола, глас 8: учениче спасов: И ныне, богородичен, или крестобогородичен. На Литургии, блаженна глас: на 4: и апостола, песнь 3, на 4. Прокимен апостола, глас 8: Во всю землю изыде вещание их: Стих: небеса поведают славу божию: Апостол деяний, зачало 21, от полу: Бе некто ученик: Аллилуиа, глас 1: Исповедят небеса чудеса твоя, Господи: Стих: Бог прославляемь в совете святых:

евангелие луки, зачало 51: Слушаяй вас: Причастен: Во всю землю: (+) В тойже день празднуем покрову пресвятыя владычицы нашея Богородицы и приснодевы марии.

Тропарь, глас 4: Днесь благовернии людие светло празднуем, осеняеми твоим Богомати пришествием, и к твоему взирающе пречистому образу, умильно глаголем: покрый нас честным твоим покровом, и избави нас от всякаго зла, молящи сына твоего, Христа бога нашего: спасти души наша.

На Велицей Вечерни: блажен муж, 1- й антифон. На Господи воззвах стихиры на 8, глас 1, подобен: о дивное чудо! Ины стихиры, глас 4, подобен: яко добля: Слава, и ныне, глас 8: Срадуются с нами: Вход, прокимен дне, и чтения три: Бытия чтение: Изыде иаков: На литии стихиры, глас 3. Слава, и ныне, глас тойже: Смысл очистивше: На стиховне стихиры, глас 2, с припевы: 1-й, Слыши дщи, и виждь: 2-й, Лицу твоему: Слава, и ныне, глас 2: яко венцем пресветлым: На благословении хлебов, Тропарь, глас 4: Днесь благовернии людие: писан на малей вечерни, и чтение. На Утрени, на Бог господь, тропарь трижды. По кафисмах седальны покрова, и чтение. По полиелеи седален, глас 4,

Слава, и ныне, тойже. Степенна, 1-й антифон, 4-го гласа. Прокимен, глас 4: Помяну имя твое: Стих: Лицу твоему помолятся: Всякое дыхание: евангелие луки, зачало 4: Воставши мариам: псалом 50. Слава, молитвами Богородицы: И ныне, тойже. Помилуй мя, Боже: По 50-м псалме стихира, глас 8: Срадуются с нами: Канон Богородицы, на 12, ирмос по дважды. По 3-й песни седален, глас 5. Слава, и ныне, тойже. По 6-й песни,

Кондак, глас 3. Подобен: дева днесь: дева днесь предстоит в церкви, и с лики святых невидимо за ны молится богу: ангели со архиереи покланяются, апостоли же со пророки ликовствуют: нас бо ради молит богородица превечнаго Бога.

И икос. По 9-й песни светилен покрова. На хвалитех стихиры на 4, глас 8. Подобен: о преславнаго чудесе! Слава, и ныне, глас 6: яко виде тя: Славословие великое. И отпуст. На Литургии. блаженна от канона, песнь 3-я, и 6-я. Прокимен, песнь Богородицы, глас 3: Величит душа моя Господа: Стих: яко призре на смирение рабы своея: Апостол ко евреем, зачало 320: Имеяше первая скиниа: Аллилуиа, глас 8: Слыши дщи, и виждь: Стих: Лицу твоему помолятся: евангелие луки, зачало 54: Вниде Иисус в весь некую: Причастен: Чашу спасения прииму: Ведомо же буди и сие: яко аще случится праздник покрова пресвятыя Богородицы в день седмичный, кроме недели, и изволит кто пети купно с покровом апостолу анании, и преподобному роману, да поет сице: На малей вечерни, стихиры покрова на 4, глас 1: самогласны. Слава, и ныне, глас 6: Приидите празднолюбных собори: На стиховне стихиры, глас 2, подобен: Доме евфрафов: Слава, и ныне, глас 3: Приидите вси празднолюбцы: Тропарь покрова писан в первой службе. Таже ектениа малая, и отпуст. На Велицей Вечерни поем, блажен муж, 1- й антифон. На Господи воззвах, стихиры покрова, на 4: И апостола, 3: И романа, 3. Слава, апостола: И ныне, покрова. Вход: Прокимен дне. Чтения 3, покрова. ектении обычныя. На литии, стихиры покрова, глас 3. Слава, апостола: И ныне, покрова. На стиховне стихиры покрова, глас 2, самогласны. Слава, преподобнаго, И ныне, покрова. На благословении хлебов тропарь покрова, глас 4: Днесь благовернии людие: трижды. И буди имя господне, трижды, с пением: и псалом 33: благословлю Господа: и чтение. На Утрени, на Бог господь, тропарь покрова: Таже апостола: Слава, романа: И ныне, покрова: и обычныя кафисмы: По кафисмах седален покрова: и чтение. По полиелеи седален покрова: и чтение. Степенна, 1-й антифон, 4-го гласа. Прокимен, глас 4: Помяну имя твое: Стих: Лицу твоему помолятся: Всякое дыхание: евангелие луки, зачало 4: Воставши мариам: псалом 50. Слава, молитвами Богородицы: И ныне, тойже. Помилуй мя, Боже: По 50-м псалме стихира, глас 8: Срадуются с нами: Канон покрова, со ирмосом на 6: и апостола на 4, и преподобнаго на 4. Катавасиа, отверзу уста моя: По 3-й песни, кондак апостола, и преподобнаго: и седален апостола: Слава, преподобнаго: И ныне, покрова, и чтение. По 6- й песни, кондак и икос покрова, писан в первой службе, и пролог. По 9-й песни светилен покрова: Слава, апостола, И ныне, покрова. На хвалитех стихиры покрова, на 4: Слава, апостола: И ныне, покрова. Славословие великое. По трисвятом тропарь апостола: Слава, преподобнаго: И ныне, покрова. ектении, и отпуст, и час 1-й. На 1-м часе, тропарь покрова: Слава, апостола: И ныне, богородичен часов. По трисвятом, кондак покрова, и совершенный отпуст. Такожде и на прочих часех, в начале глаголем тропарь покрова: святых же тропари пременяем. Кондак же на всех часех глаголем покрова. На Литургии, блаженна, от канона покрова песнь 3, на 4: и апостола 6-я, на 4. По входе, тропарь покрова, и апостола, и преподобнаго. Кондак апостола: Слава, преподобнаго: И ныне, покрова. Прокимен, песнь Богородицы, глас 3: Величит душа моя Господа: Стих: яко призре на смирение рабы своея: И апостола: Во всю землю: Апостол покрова, ко евреем, зачало 320: Имеяше первая скиния: и апостола, деяний, зачало 21, от полу: Бе некто ученик в дамасце: Аллилуиа, глас 8: Слыши дщи и виждь: Стих: Лицу твоему помолятся: и апостола, Исповедят небеса чудеса твоя: евангелие луки, зачало 54: Вниде Иисус в весь

некую: и апостола, луки, зачало 54: Слушаяй вас: Причастен, Чашу спасения: Другий, Во всю землю: Ряд, апостол, и евангелие, вычитаем напреди.

[Смотри] Подобает ведати, яко аще случится праздник пресвятыя Богородицы честнаго ея покрова, и святаго апостола анании в неделю. На Велицей Вечерни, на Господи воззвах, стихиры воскресны три, и анатолиев 1, и покрова три, и апостола анании, 3, Слава, покрова: И ныне, богородичен гласа. Чтения покрова, три. На литии стихиры покрова: Слава, апостола: И ныне, покрова. На стиховне стихиры воскресны: Слава апостола: И ныне, покрова. На благословении хлебов тропарь покрова, трижды. Аще ли несть бдения, глаголем тропарь воскресн: Слава, апостола: И ныне, покрова. На Утрени, на Бог господь, тропарь воскресн, дважды. Слава, апостола: И ныне, покрова. По кафисмах седальны воскресны, и богородичны их. Таже полиелей, и тропари, Ангельский собор: и впакои гласа, и седальны покрова вси. Степенна, и прокимен гласа. евангелие воскресно, и прочая. Канон воскресн со ирмосом на 4, и покрова на 6, и апостола на 4. Катавасиа, отверзу уста моя: По 3-й песни, кондак покрова, и апостола, и седален апостола: Слава, и ныне, покрова. По 6-й песни, кондак воскресн. На 9-й песни поем честнейшую: Светилен воскресн, Слава, апостола: И ныне, покрова. На хвалитех стихиры воскресны 4, и покрова 4, со славным, с припевы вечерними. Слава, стихира евангельская: И ныне, Преблагословенна еси: Славословие великое. По трисвятом, тропарь воскресн, ектении, и отпуст, и час 1-й. На 1-м часе, тропарь воскресн: Слава, покрова: И ныне, богородичен часов. По Отче наш, кондак покрова. На 3-м часе, тропарь воскресн, Слава апостола: И ныне, и богородичен часов. По Отче наш, кондак воскресн. Такожде и на прочих часех глаголем кондак воскресн, и покрова, пременяюще. На Литургии, блаженна гласа, на 4, и покрова песнь 3-я, на 4, и апостола песнь 6, на 4. По входе тропарь воскресн, и покрова, и апостола. Кондак воскресн: Слава, апостола: И ныне, покрова. Прокимен, апостол, Аллилуиа, евангелие, и причастен, прежде воскресн, и потом Богородицы. [Смотри] преподобнаго же романа служба оставляется, и поется на повечерии.

(:. преподобнаго отца нашего саввы, вишерскаго чудотворца.

Совершается собор его во обители его, по свидетельству архиереа сущаго тамо.

Тропарь, глас 4: от юности твоея весь Богу поработился еси, блаженне, и того ради любве отечество и род оставил еси, в пустыню вселився, и в ней жестокое житие показав, чудес дарования от Господа приял еси, савво преподобне: моли Христа Бога, спастися душам нашим.

Кондак, глас 8. Подобен: Взбранной: отечества, преподобне, удалився, и вселився в пустыню, и тамо на столп вшед, идеже жестокое житие показал еси, и многих житием удивив, отнюдуже дарование чудес от Христа приял еси. поминай нас чествующих память твою, да зовем ти: радуйся, савво, Отче наш.

2. (:. святаго священномученка киприана: И святыя мученцы иустины: И святаго и блаженнаго андреа, Христа ради юродиваго.

На Господи воззвах стихиры на 6, глас 3. Подобен: яко добля: Слава, глас 2: учения прелесть: На стиховне октоиха. Слава, глас 2: Светильника богосияннаго: Тропарь, глас 4: И нравом причастник: септемвриа в 3-й день. На Утрени, на Бог господь, тропарь святаго, дважды: и обычныя кафисмы, и чтения. Оба канона октоиха без мученичнов: и святых глас 4, на 6. По 3-й песни седален, дважды. По 6-й песни,

Кондак, глас 1. Подобен: Лик ангельский: от художества волшебнаго обратився, Богомудре, к познанию божественному: показался еси миру врачь мудрейший, исцеления даруя чествующим тя, киприане со иустиною: с неюже молися человеколюбцу владыце, спасти души наша.

И икос, и пролог. По 9-й песни светилен октоиха: Слава, святаго: И ныне, богородичен. На стиховне октоиха. Слава, глас 8: Иже злобы: И ныне, богородичен, или крестобогородичен. На Литургии, блаженна октоиха, на 4: и святых песнь 3-я, на 4: Прокимен, глас 6: честна пред господем: Стих: Что воздам: Апостол к тимофею, зачало 280: благодарю укрепляющаго мя Христа: Аллилуиа, глас 2: священницы твои облекутся: евангелие Иоанна, зачало 36: Аз есмь дверь: Причастен, В память вечную: [Смотри] Служба святаго андреа юродиваго поется на повечерии.

Тропарь андрею, глас 1: Глас апостола твоего павла услышав глаголющ: мы юроди Христа ради. раб твой андрей юрод бысть на земли, тебе ради, Христе Боже: темже ныне память его почитающе, тебе молимся, Господи, спаси души наша.

Кондак, глас 4. Подобен: Вознесыйся: Во юродство претворився волею, мира сего красоты отнюд возненавидел еси, плотская мудрования увядил еси, постом и жаждею, и зноем и студению мраза, от дождя и снега, и от прочия воздушныя тяготы никогдаже уклонився, очистил еси себе яко злато в горниле, андрее блаженне.

3. (:. святаго священномученка дионисиа ареопагита.

На Господи воззвах, стихиры на 6: глас 1. Подобен: небесных чинов: Слава, глас 2: Приидите согласно: На стиховне октоиха. Слава, глас 4: небеснаго знания.

Тропарь, глас 4: благости научився, и трезвяся во всех, благою совестию священнолепно оболкся, почерпл еси от сосуда избраннаго неизреченная, и веру соблюд, равное течение совершил еси, священномучениче дионисие. моли Христа Бога, спастися душам нашим.

На Утрени, на Бог господь, тропарь святаго, дважды, и обычныя кафисмы: и чтения. Оба канона октоиха. И святаго на 6, глас 8. По 3-й песни седален, дважды. По 6-й песни,

Кондак, глас 8. Подобен: Взбранной: небесная врата прошед духом, яко ученик, до третияго небесе достигшаго апостола, дионисие, неизреченных обогатился еси всяким разумом, и озарил еси во тьме неведения седящия. темже зовем: радуйся, отче всемирный.

И икос, и пролог. По 9-й песни, светилен октоиха: Слава, святаго, и ныне, богородичен. На стиховне октоиха, Слава, святаго, глас 8: Во святителех, и мученцех: На Литургии, блаженна октоиха, на 4: И святаго песнь 3-я на 4. Прокимен, глас 8: Восхвалятся преподобнии во славе: Стих: Воспойте господеви песнь нову: Апостол деяний, зачало 40 от полу: Поемше павла ведоша на ареопаг: Аллилуиа, глас 2: священницы твои облекутся: евангелие матфеа, зачало 55 от полу: Подобно есть царствие небесное человеку купцу: Причастен: В память вечную:

4. святаго священномученка иерофеа, епискпа афинскаго.

Стихиры октоиха, 3: И святаго 3, глас 4. Подобен: Дал еси знамение: Слава, глас 2. Самогласен. Представ успению: На стиховне октоиха. Тропарь вчерашний. На Утрени, оба канона октоиха: и святаго на 4, глас 8. По 3-й песни,

Кондак, глас 8. Подобен: Взбранной: священноначальника афинскаго восхваляем тя, яко тайноучившеся тобою странным и неизреченным: явился бо еси богоприятный песнословец. но моли, всеблаженне иерофее: от всяких нам грехопадений избавитися, да зовем: радуйся отче Богомудре.

И седален святаго. По 6-й песни,

Кондак, глас 4. Подобен: Вознесыйся: якоже столп непоколебимь иерофее, прещения врагов не устрашился еси: но прелести разрушил еси твердыню, яко камень честен валяяся отче. тем владыка тя храбрствовавша венчает живоначальною и божественною десницею, егоже о всех нас умоли.

И икос. По 9-й песни светилен октоиха: Слава, святаго. На стиховне октоиха.

(:. В тойже день обретение честных мощей, иже во святых отец наших, гуриа перваго архиепископа казанскаго и варсонофиа епискпа тверскаго.

Совершается собор их во граде казани, и во храме их.

Тропарь, глас 3: Первии учителие прежде темному, ныне же светлому и новопросвещенному граду казани, первии возвестителие пути спасительнаго, истиннии хранителие апостольских преданий, столпи непоколебимии, благочестия учителие, и православия наставницы, гурие и варсонофие, владыку всех молите, мир вселенней даровати, и душам нашим велию милость.

Кондак варсонофию, глас 6: Воздержанием тело духу поработив, душу же равноангельну сотворил еси: сего ради святительства саном почется: чисте чистейшему предстоиши. моли Христа Бога, святителю, спасти императора нашего вседержавнаго, благочестия содержителя, и люди твоя, святе, да вси вопием ти: радуйся, отче преподобне варсонофие, граду нашему казани похвала и утверждение.

Кондак, гурию, глас 4: Чувственныя страсти победив, чистотою яко солнце возсиял еси, чисто житие до конца сохранив, и от неверия веру многих ко христу привел еси, и того ради от бога нетлением почтен был еси, и чудесы удивляемь. молим тя, святителю гурие, молитвами твоими от бед избави нас да зовем ти: радуйся, отче предивный, граду казани похвала и утверждение.

5. святыя мученцы харитины: Стихиры октоиха, 3: и святыя, 3, глас 4. Подобен: яко добля: На стиховне октоиха. Тропарь, глас 4: Агница твоя, Иисусе: септемвриа в 17-й день. На Утрени, оба канона октоиха, и святыя на 4: глас 4. По 3-й песни, седален. По 6- й песни,

Кондак, глас 2. Подобен: Выших ищя: Крепким разумом, харитино, душу утверждши верою, борителя врага яве посрамила еси: у Христа предста, всеблаженная, червленицу от кровей твоих носящи и присно со ангелы радующися: моли за ны страстотерпице.

На стиховне октоиха.

(:. В тойже день святых святителей, петра, алексиа, ионы и филиппа, митрополитов московских, и всея россии чудотворцев.

Совершается собор их, идеже лежат мощи их, и идеже храм их.

Тропарь, глас 4: Первопрестольницы российстии, истиннии хранителие апостольских преданий, столпи непоколебимии, православия наставницы, петре, и алексие, ионо и филиппе, владыку всех молите, мир вселенней даровати, и душам нашим велию милость.

Кондак, глас 3. Подобен: дева днесь: Во святителех благочестно пожисте, и люди к богоразумию настависте, и добре Богу угодисте: сего ради от него нетлением и чудесы прославистеся, яко ученицы божия благодати.

6. + святаго и славнаго апостола фомы.

На Велицей Вечерни, поем блажен муж: 1-й антифон: На Господи воззвах, стихиры апостола, на 8, глас 4. Подобен: яко добля: Слава, глас 6: яко слуга слова: И ныне: Кто тебе не ублажит: Вход. Прокимен дне. и чтения 3. 1-е, Соборнаго послания иоаннова: еже бе исперва: 2-е, иаковля: иаков Богу и господу Иисусу христу раб: 3- е, иудина: иуда Иисусу христу раб: На литии стихира храма и апостола, глас 4. Подобен: яко добля: Слава, глас 2: оставив земная: И ныне: Все упование мое: На стиховне стихиры, глас 4. Подобен: Дал еси знамение: с припевы их. Слава. глас 6: божественныя видя: И ныне, Богородице, ты еси лоза: По трисвятом тропарь, глас 3: Апостоле святый: септемвриа в 20-в день.

Или сей, глас 2: ученик христов быв, божественнаго собора апостольскаго сопричастник, неверствием бо христово воскресение известив, и того пречистую страсть осязанием уверив, фомо всехвальне, и ныне нам проси мира и велию милость.

Слава, и ныне, богородичен: и отпуст. На Утрени, на Бог господь: тропарь апостола, дважды. Слава, и ныне, богородичен воскресн. По кафисмах седальны апостола, с богородичны их. И чтение. По полиелеи седален глас 3. дважды. Слава, и ныне, богородичен. Степенна, 1-й антифон, 4-го гласа. Прокимен, глас 4: Во всю землю: Стих: небеса поведают: Всякое дыхание: евангелие Иоанна, зачало 67: явися Иисус учеником своим: По 50-м псалме стихира, глас 4: Христос великое солнце: Канон Богородицы, со ирмосом на 6: и апостола на 8, глас 4. Катавасиа: отверзу уста моя: По 3-й песни, седален, глас 8, дважды. Слава, и ныне, богородичен. По 6-й песни,

Кондак, глас 4. Подобен: явился еси днесь: Премудрости благодати исполнен христов апостол, и служитель истинный, в покаянии вопияше тебе: ты мой еси Бог же и господь.

И икос. И пролог. По 9-й песни, светилен апостола. Слава, другий. И ныне, богородичен. На хвалитех стихиры апостола на 4, самогласны, глас 1: христу последовал еси: Слава, глас 6: На колеснице добродетелей: И ныне, богородичен. Славословие великое. По трисвятом, тропарь апостола: Слава, и ныне, богородичен воскресн. ектении, и отпуст, и час 1-й. На Литургии, блаженна апостола, от канона песнь 3, и 6, на 8. Прокимен, глас 8: Во всю землю: Стих: небеса поведают: Апостол к коринфяном, зачало 131: Бог ны посланники: Аллилуиа, глас 1: Исповедят небеса. евангелие Иоанна, зачало 65: Сущу позде: Причастен: Во всю землю:

7. (:. святых мученик, сергиа и вакха.