ПОЛНАЯ РЕДАКЦИЯ ПО МУЗЕЙНОМУ СПИСКУ

[ПОВЕСТЬ ОБ ОСНОВАНИИ И ВЗЯТИИ ЦАРЬГРАДА]

Глава I.. Начало соружения Царяграда.

Когда разравнивали место 7 холмов,

созидали Царьград во имя царя Констянтина Ивановича

В лето 5 тысящь 818 царьствующу в Риме богосодетельному царю Констянтину Флавию, со тщанием с великим отвсюду собрав от земъствованных христиан, и нача укрепляти и разширяти веру християнъскую и церкви божия украшати, а иныя преславныя воздвизати, а идолов сокрушати и домы их в славу божию превращати. И к тому законы многия уставляти, яко идольския капища святителем Христовым и християном точию владети и рядити, в среду и в пяток поститися страстей ради Христовых, а в неделю праздновати воскресения ради Хри­стова. Жидове же жертвы не творят, и на распятие не осуждати никого же нечестия ради Христова, и раб не покупати никому же от них, на златницах образу его писати. И бысть радость великая повсюду християном.

В 13 лето царства его, советом божиим подвизаем, восхоте создати град во имя свое и посла мужей мудрых во Асию, и во Ливию, и во Европию на взыскание и избрание таковаго града и на создание преславна и нарочита места. Онем же воз­вратившимся, и сказываху царю различные места преславная, наипаче похвалиши ему Византию и Македонию. Он же болши и прилежаще мыслию своею на Троаду, идеже всемир­ная радость, победа бысть греком на фряги. И сице помышляющу царю во дни и в нощи, слышав же во сне глас гла­голя: “В Визанътию подобает Констянтину граду создатися”.

И абие царь возбудився от сна своего, въскоре посла в Визан­тию магистров своих градцких делателей готовити место. А сам же царь, остави в Риме кесарей два сына своя, Консту и Констянтина, а сыновца своего Адаманта и посла во Вританию. И прииде царь с материю своею со царицею Еленою в Визан­тию; и с нею же взя жену свою, царицу Максимъяну, дщерь Диоклитияна царя, и сына своего Констянътина, и зятя своего Ликиния, и два брата своя Далмата и Констянтина, и Долма­това сына Долмата же, и Констянтиновых дву сынов Гула и Улияна. И пряшед в Византию, и виде на том месте 7 гор и глушиц морьских много, и повеле горы рыти, а нижняя места наполняти, и по глушицам столпы повеле каменныя ставите и на них своды сводити, и ровняти место; а сам царь пребываше в Византии. Егда же уготоваша место, собрав царь велмож и мегистанов, и нача мыслити, как быти стенам и стрелницам. И повеле размеривати место на три углы, на все страны по седми веръст; тако бо место межу дву морь, Чермнаго и Белаго.

И се змий, внезапу вышел из норы, гордый и лукавый и потече по ровному тому месту; и абие с небесной высоты сшел орел и змия похватил и полете на высоту небесную. Змий же нача круг орла укреплятися. Царь же и вси людие бяху зряще на орла и на змия. Орел же излете изо очию на дол­гий час и паки явися летаючи ниско, и паде орел с змием на то же место, понеже одолен бысть от змия. И людие же, текше, змия убили, а орла поймали. И бысть царь во ужасе велице, и созва книжники и мудрецы, и сказа им знамение. Они же поразсудиша царю: “А се место 7-ми холмное наречется и про­славится и возвеличится по всей вселенней паче иных градов, но понеже станет меж дву морь, биен будет волнами морьскими, и поколеблен будет. А орел есть знамение сия веры християнъския, а змия есть знамение бесерменское. И понеже змий одоле орла, являет, яко бесерменьство одолеет христьянство; а понеже християня змию убили, а орла поймали, являет, яко напоследок паки християня одолеют бесерменство, Седмихолмаго приимут и в нем воцарятся”.

Великий же Констянтин о сем возмутися зело, и словеса их повеле написати, а магистров и градцких делателей повеле раз­делите и нача град делати, градцкие стены и стрелницы, а ко другой стране повеле размеривати улицы и площади на римьския обычаи. И так нача делати церкви божия, и двор царский и иныя домы славныя велможам и магистаном и всем санов­ником , и воды сладкия приводити.

В 7-е лето виде царь во граде мало живущих людей, зане бо велик зело, и тако сотворив: послав из Рима и от иных стран собрати достохвалных мужей великих и мегистанов, сановни- ков, и множество людей, и ту их приведе, и домы им великие создав, дале жити им во граде со устроением великим и цер­ковным чином, яко своя домы их и отечество забыти. Создав же царь полату велику, иподрому предивную, и два поля устрои, сииречь улицы покровенные, на торгование; и наречеся Новый Рим. И потому же создася храм святыя Софеи, и свя­тых Апостол, и святыя Ирины, и святаго Мокия, и святаго архангела Михаила и святаго чюдотворца Николы, и иные многие пречюдныя храмы постави, а он столп багряный, егоже из Рима принесе морем трема леты до Царяграда, зане велик бе и тяжек, с моря же до торгу единым летом принесен бысть, и царю часто приходящу злата много дающе людем брежения ради. И положи основание брежения ради 12 кошь, ихже благослови Христос, от древа честнаго и святых мощей на утвержение и сохранение предивнаго и единокаменнаго столпа, егоже принесе от солнечного града Фругийскаго и постави на нем кумир, имущи на главе 7 лучь. Такоже и иныя вещи предивныя и достохвалныя принесе от стран изо многих градов, преукрасив град, и возда ему честь великую и обновление, праздники, торжествы великими на многи дни; тако уставя: “Да зовется Царьград”. И бысть радость велия в людех. Днем же минувшим, и паки царь с патриярхом и святи­тели, и собра весь чин священнический, такожде весь и церков­ный чин, и множество народа, и сотвориша литию, молбы, и моление, дающе хвалу богу и благодарение всемогущей и животворящей троице, отцу и сыну и святому духу, и пречи­стой богоматери. И предаша град и всяк чин человеческие в руце всесвятей владычице богородицы Одигитрие, сиирече наставнице, глаголюще: “Ты еси всенепорочная владычице богородице, человеколюбивая и естеством сущи, не остави град достояния своего, но яко мати человеческому роду, заступи и помилуй, и сохрани его, уставляя и научая во всем и во вся времена, яко человеколюбивая и милостивая мати, яко да в нем прославится и возвеличится имя великолепия твоего во веки”.

И вси людие рекоша “Аминь” и благодариша царя и похвалиша добрый его разум, еже к богу желание.

Царь же нудяше стратигов и градцких делателей храмы свя­тых и домы миръския создати на исполнение граду, велможам и мегистаном и всем нарочитым людем заповеда: аще кто спо­добится коея степени царскому чину, да сотворит себе память достохвалную, или дом воздвигнет, или обитель славну, или иное создание дивное, яко да населится град преславными делы. Такоже по нем цари и царицы, кождо во свое время, подвизашеся сотворити вещь преславну и нарочиту: овии будет на взыскание и собрание страстей господних, и пречистой его богоматери ризы, и святых мощей и божественых икон, ино того самого богомужнаго нерукотвореннаго образа, Христа бога нашего, его же от Едеса, овии же на прибавление граду и домов великих, а иных же на воздвизание святых обите­лей, храмов божественых, яко великий Устиян царь и Феодо­сии великий и царица Евдокия, жена Ираклиа царя, и иные мнози. И так наполниша грады преславными и дивными вещми, имже иногда блаженный Андрей Критъцкий удивися, и рече: “Во истину град сей выше слова и разума есть”. К сим же пренепорочная владычице богородице мата Хри­ста бога нашего во оно время бяше Царствующий град сохра­няюще, и от бед спасающе, и от неисцелных напастей пременяюще. И такими убо великими и неизреченными деянми дарованием пречистыя богородицы сподобися град сей, яко всему миру, мню, недостойну быти. Но убо естество тяжкосердо и нерадиво, яко неистово: юже на нас милость божию и щедрот его отвращаемся на злодеяние, беззаконием обращаемся. Мы же бога и пречистую его богоматерь разгне­ваем и славы своея и чти отпадаем. Якоже есть писано: злодея­ние и беззаконие превратит престол силных; паче разточи гордыя мысли сердца их, низложи силныя со престол; такоже сии Царствующий град, неизреченными деянми беззаконными от толиких щедрот и благодеяния пречистая богоматери отпадше, тмочисленными бедами и различными напастьми много лет пострада, такоже и ныне, в последнее время, грех ради наших овогда нахождением неверных, овогда же гладом и поветреи частыми, овогда же межуусобныя брани, ими же оскудеша силнии, и обнищаша людие, преуничижися град и смирися до зела.