«Цаһан күүклдә серв, хувцан өмсхәр бәәнә»

Наадна күсл: Бичкдүдин медрл батлх: хувц-хунрин туск медрл; яһҗ хувц өмсдг; күүклдә яһҗ бәрдг авъяс батлх. Йөрәл келдг дасхх. «Өмссн хувцн өлзәтә болтха!» Яһҗ хувц өмскдг дасхх. Дара-даранднь яһҗ хувц өмсдгнь батлх. Бичкдүд товчлдг, бүч боодг дасхх.

Наадна зокал: Неҗәдәр һарад хувц күүклдәд өмсүлх.

Наадна үүлдвр: Багшин келсиг үзүләд, келх.

Наадна зер-зев: Күүклдә, энүнд кергтә зөвтә хувцн.

Багшин, сурһачин үүлдвр: Урдаснь күүклдәд хувц-хунр уйҗ белдх. Гиигн болн дулан хувц белдх.

Наадна нерн: Юн сольгдв?

Наадна күсл:

- Нег юмиг сәәнәр хәләҗ нерәдг дасхх.

- Нег юмна үүлдвр келҗ чаддг дасхх.

- Бичкдүд нег юм шинҗләд хәләдг дасхх.

- Олнас нег онц темдг шинҗлҗ чаддг дасхх.

Наадна зокал: Оньгаг өгч хәләх, һаран өргәд келх.

Наадна үүлдвр: Багшин (эс гиҗ сурһмҗлачин) келсиг оньган өгч соңсх, онц темдг йилһҗ келҗ өгх. Юн әдл, әдл биш йилһҗ келх.

Наадна зер-зев: Зургуд, хувц-хунр.

Багшин, сурһачин үүлдвр: Багш эс гиҗ сурһмҗлач бичкдүдин оньгинь тусхаҗ, хувц-хунрин онц темдг йилһдг, келдг дасхх (өңгәр – по цвету, кемҗәһәр – по размеру).

«Илвтә белг».

Наадна күсл: Бичкдудиг нег юмна онц темдг йилһҗ чаддг дасхх.

Наадна зокал: Нег юмиг бәрҗ үзәд келх. Тулмин бүч тәәлшго, кемр келсн юмиг таньҗ чадсн уга, эс гиҗ чик эс келхлә.

Наадна үүлдвр:

- Тулм дотр бәәх юмна туск келсн цагт һарһҗ авх.

- Нег юмиг һарарн бәрҗ үзх.

- Нег юмна туск тәәлвр олх.

Наадна зер-зев: Тулм, наадһас

Багшин, сурһачин үүлдвр: Урднь кергтә наадһас болн сәәхн тулм белдх. Багш эс гиҗ сурһмҗлач һарһҗ авсн наадһа чикәр нерәдҗ кедлг дасхх.

«Бичә эндүр!»

Наадна күсл: Эргндк бәәдл-җирһллә таньлдулх. Земш болн темсд нерәдҗ, келдг дасхх.

Наадна зокал: Бичкдүд болһн зург олзлад, нег зург кеҗ негдүлдг дасхх.

Наадна үүлдвр: Зургуд негдүлҗ чаддг дасхх. Кесг әңгәс тогтсн зург негдүләд юн болсинь келх. Үлгүрнь: - Эн боднцг.

Наадна зер-зев: Зургуд, кесг әңгд керчсн зургуд. Земш, темсн, хот-хол, герт бәәх хамг юмн.

Багшин, сурһачин үүлдвр: Сурһмҗлач урдаснь зургуд белднә.

Зургуд негдүлҗ чаддг дасхх, цааранднь бийснь зургуд негдүләд, келдг дасхх.

V. Наадн-даалһвр (Игры - поручения)

«Панр шата» эс гиҗ « Сәәхн тасм олҗ үз»

Наадна күсл: Юмна өңг болн кев-янз нерәдҗ чаддг дасхх.

Багшин, сурһачин үүлдвр: Кергтә өңгтә панр эс гиҗ тасм олх.

Наадна зокал: Багш эс гиҗ сурһмҗлач олн-зүсн панр бичкдүдлә хәләҗ шинҗлнә. Наадна зокал цәәлһҗ өгнә. Панр болһниг багин хорад тал-талдан ормд тәвнә.

Наадна үүлдвр: Күүкд панр авад өңгнь, кев-янз келнә.

Үлгүрнь: Эн панр улан, бичкн. Панр хәләһәд, кергтә өңг олҗ чадлһн. Нег панр авад өңгнь келх.

Багш: - Кенд улан панр бәәнә?

Бичкдүд олҗ авад келнә: Нанд улан панр бәәнә.

Багш: - Кенд ик шар панр бәәнә?

Бичкдүд олҗ авад келнә: Нанд шар панр бәәнә.

Багш: - Кенд бичкн шар панр бәәнә?

Бичкдүд олҗ авад келнә: Нанд бичкн шар панр бәәнә.

Иим кевәр талдан панрин (тасмин) өңг келнә.

Наадна зер-зев: Олн-зүсн өңгтә панр белдх, эс гиҗ олн өңгтә тасм (ут болн бөдүн ахр тасм өгч болх).

«Эн күүкиг хувцлтн»

Наадна күсл: Юмна өңг-зүс йилһҗ чаддг дасхх. Хувц нерәдҗ келх. Күүклдәд бүшмүд олҗ чадх.

Наадна зокал: Багшин келсиг күцәҗ чадлһн.

Наадна үүлдвр: Күүклдә хувцлһн. Багш бичкдүдиг дуудад келнә. Ода эн күүкдә хувцлтн.

Наадна зер-зев: Күүклдәс (ик, бичкн, өндр, маштг). Хувцн олн-зүсн өңгтә болн кев-янзта.

Багшин, сурһачин үүлдвр: Багш эс гиҗ сурһмҗлач бичкдүдиг күүклдә болһна хувц йилһҗ авч чаддг дасхх. Сурврмуд тәвх, теднәс хәрү хальмг келәр келүлх.