- •1. Паняцце структурнай геалогiі
- •2. Метады даследаванняў геалагічных структур
- •3. Гiсторыя фармiравання структурнай геалогii
- •4. Тапаграфiчная аснова геалагiчных карт
- •Абазначэнне наменклатурных лістоў
- •5. Паняцце геалагiчнай карты
- •6. Слой, слаiстасць. Элементы залягання слаёў
- •7. Магутнасць слоя (пласта). Варыянты вымярэння магутнасці слаёў
- •8. Напружаннi ў зямной кары і сiлы, якія iх выклiкаюць
- •9. Вертыкальныя I гарызантальныя тэктанічныя рухi
- •10. Разрыўныя (дыз’юнктыўныя) дэфармацыі пластоў горных парод
- •11. Магматычныя і метамарфічныя целы
- •12. Спалучэнне структурных форм
- •13. Геалагічнае мадэліраванне
9. Вертыкальныя I гарызантальныя тэктанічныя рухi
Механізм дэфармацый вызначаецца дзеяннем двух асноўных тыпаў рухаў – вертыкальнага і гарызантальнага – ці аднаго з іх.
Вертыкальныя рухі – гэта рухі ў напрамку радыуса Зямлі, бываюць дадатнымі (накіраваны ўверх) і адмоўнымі (накіраваны ўніз). Яны абазначаюцца літарай і называюцца нармальнымі (рыс. 10, а). Знак вертыкальных рухаў можа мяняцца ў часе, што адпавядае хістальнаму рэжыму развіцця структур зямной кары.
Гарызантальныя рухі – гэта рухі па датычнай да паверхні геоіда; абазначаюцца літарай і называюцца тангенцыйнымі.
Спалучэнне вертыкальных і гарызантальных рухаў абумоўлівае ўзнікненне і развіццё складкавых і разрыўных дэфармацый горных парод. Вертыкальныя і гарызантальныя рухі тэктанічных структур зямной кары адбываліся на працягу мільярдаў гадоў. Каб аднавіць іх паслядоўнасць пры рэканструкцыі фарміравання гэтых структур, недастаткова толькі геалагічных ведаў, таму да іх далучаюць матэматычныя, фізічныя і хімічныя метады даследавання і мадэліравання.
Дэфармацыі пластоў і горных парод
Дэфармацыя – гэта змена формы і аб’ёму цела пад уплывам дзеючых сіл. Дэфармацыі залежаць ад якасцей рэчыва, з якога складзена парода, умоў, у якіх яна знаходзіцца (тэмпература, вільготнасць і інш.), і моцы эндагенных і экзагенных сіл, якія дзейнічаюць у розных напрамках.
Усе дэфармацыі слаёў і парод можна падзяліць на складкавыя (пластычныя, плікатыўныя) і разрыўныя (дыз’юнктыўныя).
Складкавыя дэфармацыі горных парод – формы парушэння манаклінальнага залягання горных парод, пластоў без разрыву іх суцэльнасці. Найбольш характэрныя формы складкавых (пластычных, плікатыўных) дэфармацый – складкі.
Разрыўныя дэфармацыі горных парод – формы парушэння манаклінальнага залягання горных парод з разрывам іх суцэльнасці. Найбольш характэрныя формы разрыўных (дыз’юнктыўных) дэфармацый – разломы.
Вывучэннем сіл, якія дзейнічаюць на цела, займаецца фізіка. Прыкладная механіка вывучае дэфармацыі, утвораныя ў выніку прымянення сіл. Прадметам вывучэння тэктонафізікі з’яўляецца гісторыя фарміравання тэктанічных структур і вызначэнне іх кінематыкі, а таксама дынаміка развіцця форм розных парушэнняў горных парод. Структурная геалогія акцэнтуе ўвагу на марфалагічным і марфаметрычным вывучэнні структурных форм, утвораных у выніку розных відаў дэфармацый горных парод.
Дэфармацыя пластоў горных парод адлюстроўваецца ў змяненні формы – аб’ёму і памераў пласта (дылатацыя) – ці ў скажэнні формы (дысторцыя).
Усе целы, якія існуюць у прыродзе, можна падзяліць на два тыпы:
ізатропныя, якія маюць аднолькавую будову і якасці ва ўсіх напрамках;
анізатропныя, у якіх якасці і будова ў розных напрамках мяняюцца.
Дэфармацыі, якія мяняюць першапачатковую форму цела, – гэта:
аднародныя (простыя, ці гамагенныя), калі адбываецца аднолькавая змена ўсіх частак дэфармуемага цела, але не мяняецца прамізна восей напружанняў і дэфармацый (расцяжэнне, сцісканне, зрух, выгін;рыс.гл. 10, б,в);
неаднародныя(складаныя, ці негамагенныя), калі адбываюцца не аднолькавыя па памерах і характары змяненні мас у розных частках цела; назіраецца скручванне цела са скрыўленнем прамых ліній і ператварэнне плоскасцей у няправільныя эліпсоідныя фігуры (скручванне, скрыўленне;гл. рыс. 10, г).
Дэфармацыя цел (горных парод, пластоў і г. д.) даволі складаны працэс, у якім выдзяляюць некалькі паслядоўных этапаў (стадый) змены першапачатковай формы (гл. рыс. 10, д):
пругкія дэфармацыі, якія знікаюць пасля прыпынення дзеяння нагрузкі;
пластычныя дэфармацыі, якія застаюцца пасля зняцця нагрузкі;
разбурэнне – незваротнае змяненне цела за мяжой трываласці горных парод, якое можа быць вынікам нармальнага расцяжэння (разрыў) ці тангенцыйнага напружання (зрух).
Велічыня пругкай дэфармацыі, згодна з законам Гука, прама прапарцыянальна прыкладзенаму напружанню. Калі нагрузка перавышае мяжу трываласці, развіваюцца пругка-вязкія, ці рэшткавыя, пластычныя дэфармацыі. Далей цела разбураецца шляхам разрываў ці сколвання.
У горных пародах інтэрвал пластычных якасцей значна большы за інтэрвал пругкіх. У крохкіх пародах невялікі інтэрвал паміж пругкасцю і трываласцю, гэта значыць, што інтэрвал пластычнасці практычна адсутнічае, і разрыў адбываецца без пластычных дэфармацый. Найбольшую здольнасць да пластычных дэфармацый маюць металы і некаторыя асадкавыя пароды (соль, гіпс, гліна і інш.). У такіх пародах вельмі працяглы этап пластычных дэфармацый, а разрыў можа і не адбыцца. Увогуле, павольныя тэмпы сілавога ўздзеяння на пароду ці пласт выклікаюць пластычныя дэфармацыі, а хуткія тэмпы ўздзеяння – крохкія дэфармацыі. Паўтор некалькі разоў рэжыму сціскання – расцяжэння выклікае стомленасць горных парод, што вядзе да іх хуткага разбурэння нават пры нязначных нагрузках.
Межы пругкай дэфармацыі вызначаюцца модулем Юнга, які значна адрозніваецца ў горных пародах, што дэманструюць вельмі шырокі спектр фізічных якасцей. Модуль Юнга складае для кварцу да 1011 Па, гіпсу 15109 Па, вапняку 85109 Па, гліны 3108 Па, кальцыту 91010 Па, базальту 97109 Па, пескавіку 5109 Па.
Суадносінымеж трываласці матэрыялаў, у прыватнасці, горных парод, наступныя:
скручванне |
|
выгін |
|
разрыў |
|
сцісканне |
1 |
: |
2 |
: |
3 |
: |
25 |
Як бачым, пароды прасцей за ўсё скручваюцца. Для выгіну пластоў патрэбна прыкласці сілы ў два разы, разрыву – у тры разы, а сціскання– у дваццаць пяць разоў большыя, чым для скручвання пароды.
Пароды могуць мець рэшткавую дэфармацыю, нават пасля зняцця нагрузкі, калі пры падзенні напружання адначасова захоўваюцца пругкія якасці дэфармацый у масе горных парод і павялічваецца пластычная дэфармацыя. Рэалізацыя рэшткаў унутранай энергіі цела, якая ўтварае рэшткавую дэфармацыю, называецца рэлаксацыяй дэфармацыі.
Падводзячы вынік сказанаму пра дэфармацыю парод, трэба адзначыць, што змена формы горных парод і ўтвораных з іх пластоў залежыць ад структуры і тэкстуры парод, неаднароднасці матэрыялу, з якога складзены пароды, іх пругкасці, пластычнасці, крохкасці, вязкасці, цвёрдасці і знешніх прычын, такіх як тэмпература, ціск, працягласць уздзеяння і інш.
Пластычныя (плікатыўныя) ДЭФАРМАцыі пластоў горных парод
Пластычная (плікатыўная) дэфармацыя, як папярэдне адзначалася, –гэта змены формы і аб’ёму цела без разрыву суцэльнасці парод, якія застаюцца пасля зняцця нагрузкі дзеючых сіл (знешніх ці ўнутраных). Звычайна пластычныя дэфармацыі прадстаўлены ў выглядзе складак.
Складка – найпрасцейшая структурная форма пластычнай дэфармацыі, гэта выгін слаёў уверх ці ўніз, у любы бок адносна старон свету. Складкі бываюць розных памераў – ад мікраскладак у некалькі сантыметраў ці нават міліметраў да макраскладак у некалькі соценьметраў. Складкі бываюць адзінкавымі ці ўтвараюць складкавыя паясы, якія называюццазонамі складкавасці.
Складкавасць– пераразмеркаванне матэрыялаў горных парод і змена магутнасці пластоў у выглядзе складак, як вынік адмоўных ці дадатных вертыкальных рухаў і (або) гарызантальнага зруху мас зямной кары.
Для апісання складак карыстаюцца марфаметрычнымі характарыстыкамі асноўных элементаў складак, якімі з’яўляюцца (рыс. 11):
крыло – бакавыя часткі складкі, якія адыходзяць ад месца перагіну слаёў ці сыходзяцца ў месцы іх перагіну;
замок – месца максімальнага перагіну (максімальнай абсалютнай крывізны) слаёў, дзе крылы сыходзяцца;
вяршыня – кропка максімальнага перагіну (максімальнай абсалютнай крывізны) на замку складкі;
ядро – унутраная частка складкі, абмежаваная крыламі;
восевая паверхня – плоскасць, якая дзеліць вугал складкі папалам;
шарнір – лінія перасячэння паверхні складкі з восевай плоскасцю; шарніры могуць быць гарызантальнымі, нахіленымі ці хвалістымі, яны паказваюць паглыбленне ці ўздым складкі;
восевая лінія (вось) – лінія перасячэння восевай плоскасці складкі з гарызантальнай плоскасцю; вось складкі мае гарызантальнае становішча і ўказвае на напрамак распасцірання складкі, а не на яе паглыбленне ці ўздым; восевая лінія праходзіць праз усе слаі зрэзанай складкі, а шарніры размешчаны на паверхні кожнага слоя;
грабен – найвышэйшыя кропкі на перагіне складкавага слоя;
кіль – кропкі з найніжэйшым месцазнаходжаннем.
Да колькасных параметраў, якімі характарызуюць складкі,адносяцца:
вышыня – перавышэнне паміж выпуклай і сумежнай увагнутай часткамі складкі;
даўжыня – адлегласць па восі складкі паміж кропкамі процілеглых паглыбленняў аднаго і таго ж слоя;
шырыня – адлегласць паміж восевымі лініямі суседніх складак;
вугал, ці вугал пры вяршыні,– вугал, які ўтвараецца лініямі працяжэння крылаў складкі; ён можа складаць ад 0 да 180;
вугал паглыблення ці ўздыму – вугал нахілу шарніра складкі адносна яго праекцыі на гарызантальную плоскасць; велічыня гэтага вугла можа складаць ад ад 0 да 90.
Марфалагічна ўсе складкі можна падзяліць на антыклінальныя і сінклінальныя.
Антыклінальныя складкі– дадатныя плікатыўныя структуры, у якіх больш старажытныя пароды знаходзяцца ў ядры, а больш маладыя – на крылах.
Сінклінальныя складкі– адмоўныя плікатыўныя структуры, у якіх больш старажытныя пароды знаходзяцца на крылах, а больш маладыя – у ядры.
Антыклінальныя і сінклінальныя складкі на картах паказваюцца выгінам ізагіпс або геалагічных меж ці іх замыканнем.
Месца злучэння крылаў антыкліналей на структурных і геалагічных картах з падзеннем слаёў у бок падножжа складкі называецца перыкліналлю (рыс.12). Такія лакальныя дадатныя структуры, прымеркаваныя да схілаў антыкліз з пакатым падзеннем на фоне манакліналей івыцягнутыя ў напрамку іх падзення, называюцца яшчэструктурнымі насамі.
Злучэнне крылаў сінкліналей на структурных і геалагічных картах з падзеннем слаёў у бок ядра называецца цэнтрыкліналлю.
Існуе шмат класіфікацый складак, прапанаваных рознымі аўтарамі з улікам пэўных набораў крытэрыяў, па якіх яны згрупаваны. З усіх класіфікацый можна вылучыць найбольш трапныя і агульнапрынятыя.
Па генезісускладкі падзяляюць:
на эндагенныя – складкі сціскання, якія ўтвораны адначасова з асадканазапашваннем ці ў выніку інверсійных рухаў у прагінах; складкі свабоднага гравітацыйнага слізгання па зрывах; складкі расцяжэння і выціскання ў бакі ў выніку вертыкальнага ўздыму; дыяпіравыя складкі; адбітыя складкі, утвораныя ў выніку рухаў па разломах; магматагенныя складкі; метамарфагенныя складкі;
экзагенныя – складкі пакрыцця; складкі нераўнамернага экзагеннага сціскання; складкі выпірання пад ціскам вышэйляжачых парод; складкі разбухання, утвораныя ў выніку змены аб’ёму парод пры гідратацыі; складкі спаўзання ці абрушэння; ледавіковыя складкі.
Асноўныя формы складак (гл. рыс. 12) па становішчы восевай лініі:
прамыя, якія маюць вертыкальнае становішча восевай лініі;
касыя (ляжачыя) – з крыламі розных напрамкаў і розных вуглоў нахілу восевых паверхняў;
нахіленыя (перакуленыя), у якіх крылы падаюць у адзін бок пад адным ці рознымі вугламі, пры гэтым падверненае крыло мае адваротную стратыграфічную паслядоўнасць адкладаў, а верхняе крыло – нармальную стратыграфічную паслядоўнасць адкладаў;
гарызантальныя (ляжачыя) – з гарызантальным становішчам восевых паверхняў, пры гэтым падверненае крыло складкі мае адваротную стратыграфічную паслядоўнасць адкладаў;
ныраючыя – антыклінальныя (перакуленыя) складкі, у якіх вяршыні накіраваныя ў бок падножжа, а восевыя паверхні і крылы выгнуты ў выглядзе скляпення;
веерападобныя – сціснутыя ў аснове і пашыраныя ў верхніх частках крылаў.
Па выяве ў плане (на карце) (рыс. 13) складкі бываюць:
лінейныя, якія маюць выцягнутыя, падоўжныя формы, пры гэтым даўжыня складкі ў шмат разоў большая за шырыню (1 : 5, 1 : 7);
брахіформныя, якія маюць форму эліпса, пры гэтым суадносіны даўжыні і шырыні 1 : 2, 1 : 4;
ізаметрычныя (купалы і дыяпіры), якія маюць прыблізна аднолькавыя папярочныя і падоўжныя памеры (напрыклад, антыклінальныя структуры – купалы, скляпенні; сінклінальныя структуры – мульды, чашы);
каробкавыя, якія маюць правугольныя формы;
віргацыя складак – раздзяленне складкі на дзве і больш.
Адносна становішча крылаў да восевай паверхні ў прасторы складкі падзяляюць:
на сіметрычныя, якія маюць люстэркавы адбітак адносна восевай паверхні; у выпадках, калі ядро складкі набывае вертыкальнае становішча, яно называецца коранем складкі;
асіметрычныя, якія маюць розную адлегласць крылаў адносна восевай паверхні і, як правіла, нахіленае становішча.
Рады складак у плане маюць наступны выгляд (рыс. 14):
ланцуговы – складкі ідуць адна за адной па прамой лініі;
кулісны – складкі ідуць адна на аддаленні ад адной, пры гэтым восевыя лініі субпаралельныя;
перысты – восевыя лініі складак разыходзяцця ад адной прамой лініі;
скучвання – восевыя лініі складак прыціскаюцца адна да адной;
віргацыі– восевыя лініі складак разыходзяцца;
міндалепадобнага пучка – восевыя лініі некалькіх складак нагадваюць міндаліну;
сігмаідальнага пучка – восевыя лініі нагадваюць літару (сігма).
Па форме замка вылучаюць складкі (рыс. 15,а,б):
вуглаватыя – вострыя (вугал меншыза 90) і тупыя (вугал большы за 90) складкі, якія маюць пляскатыя крылы і вузкі замок;
акруглыя, якія маюць хвалепадобныя выгіны слаёў на вертыкальным зрэзе і адносна шырокія замкі і пляскатыя часткі на крылах;
каробкавыя, якія маюць шырокія ці гарызантальныя замкі і крутыя крылы, штоўтвараюць каленападобныя вуглаватыя перагіны; сярод гэтых складак сустракаюць прамыя, касыя, нахіленыя.
Флексуры – каленападобныя перагіны слаёў, якія ўтвараюцца спалучэннем дзвюх вуглаватых складак. Флексуры могуць быць (гл. рыс. 15, в):
гарызантальнымі (прамымі), якія маюць гарызантальнае становішча крылаў флексуры;
больш пакатымі з глыбінёй;
нахіленымі, якія маюць нахіл крутой часткі калена ў бок агульнага падзення слаёў;
перакуленымі (адваротнымі), іх паднятыя крылы закінуты на часткі, якія знаходзяцца ніжэй.
Да форм высокіх структурных рангаў можна аднесці дадатныя і адмоўныя структуры вялікіх памераў у некалькі дзесяткаў і соцень кіламетраў.
Дадатныя формы высокіх рангаў:
антэклізы – вялікія па памерах працяглыя выгіны ў форме антыкліналей з нахілам слаёў на крылах у некалькі градусаў;
скляпенні – меншыя па памерах за антыклізы ўскідавыя структуры з падзеннем слаёў на крылах да 45–70;
валы – выцягнутыя ў плане асіметрычныя структурныя формы значных памераў.
Адмоўныя формы высокіх рангаў:
сінеклізы – прагіны з пакатым падзеннем пластоў на крылах у некалькі градусаў;
упадзіны (дэпрэсіі) – меншыя па памерах за сінеклізы прагіны, якія маюць выцягнутую ў плане форму і абмежаваныя цэнтрыкліналямі.
Структурныя дадатныя і адмоўныя формы высокіх рангаў спалучаюцца ў зямной кары і ўтвараюць яшчэ большыя па памерах структуры, якія працягваюцца на сотні кіламетраў. Гэта антыклінорыіісінклінорыі (рыс. 16, а).
Антыклінорыі – буйныя антыклінальныя структуры зямной кары, якія ўтвораны ў выніку спалучэння дадатных і адмоўных форм высокіх рангаў.
Сінклінорыі – спалучэнне дадатных і адмоўных форм высокіх рангаў на фоне агульнага паглыблення часткі зямной кары.
У сваю чаргу, антыклінорыі і сінклінорыі могуць таксама спалучацца ў зямной кары і ўтвараць найбуйнейшыя структуры з агульным уздымам – мегаантыклінорыі і агульным паглыблен-нем – мегасінклінорыі. Структуры такога класа маюць часам памеры большыя за тысячу кіламетраў.
Спалучэнне больш дробных складкавых структур у антыклінорыях і сінклінорыях, мегаантыклінорыях і мегасінклінорыях на адным парадкавым узроўні называецца вергентным (гл. рыс. 16, б). Такое спалучэнне можа быцьканвергентным, калі восевыя паверхні складак вертыкальныя,дывергентным,калі восевыя паверхні складак разыходзяцца ў бакі ад ядра буйнейшай структуры,і антывергентным, калі восевыя паверхні складак сыходзяцца да замка буйнейшай структуры.
Калі разглядаць спалучэнне лінейных форм на картах, то можна заўважыць такую з’яву, як кульмінацыя складак – адначасовы ўздым або паглыбленне слаёў зямной кары. Паралельныя рады складак называюцца ступеньчатымі радамі і могуць быць лінейнымі (ланцуговымі), кулісападобнымі, перыстымі, скучанымі, дугападобнымі, радыяльнымі, паўколавымі ці колавымі. Ступеньчатыя рады складак могуць мець разгалінаванне, гэта значыць быць вергентнымі.