3. Жолаушыларды ақпараттық қамтамасыз ету

 

91. Автовокзалдарда (автостанцияларда) жолаушыларды автобустардың қозғалысы, жол жүру мен багажды алып жүру шарттары және көрсетілетін қызметтер мәселелері жөніндегі анық, жеткілікті және уақытылы ақпаратпен қамтамасыз етуге арналған анықтамалық-ақпараттық қызметтің жұмысы ұйымдастырылады.

92. Жолаушыларды ақпараттық қамтамасыз ету көрінетін анықтаманың, дауыстап айту байланысының және ауызша анықтаманың көмегімен жүзеге асырылады.

93. Көрінетін ақпарат:

1) тәуліктің кез келген уақытында жақсы көрінуі;

2) барынша анық және толық болады.

Бұл ретте, егер автовокзал, автостанция немесе кассалық пункт тәулік бойы жұмыс істемесе, сыртында мынадай ақпарат орналастырылады:

1) осы автовокзал, автостанция, кассалық пункт арқылы өтетін маршруттар бойынша автобустардың, шағын автобустардың қозғалыс кестесі;

2) автовокзалдың, автостанцияның, кассалық пунктің жұмыс уақыты.

94. Автобустардың қозғалыс кестесінде мынадай мәліметтер болады:

1) маршруттың нөмірі;

2) маршруттардың атауы;

3) автобустың, шағын автобустың жөнелтілу уақыты;

4) соңғы пунктке келу уақыты;

5) осы автовокзалға (автостанцияға) келу уақыты және тұру уақыты (транзиттік рейстер үшін)

95. Кассалардың көрінетін ақпаратында мыналар болады:

1) кассаның нөмірі;

2) кассаның мамандануы;

3) жұмыс режимі;

4) билетті кезектен тыс сатып алатын жолаушылар санаттарының Қазақстан Республикасының заңнамасында белгіленген тізбесі;

5) жолаушылардың жеке санаттарының жеңілдетілген жол жүру шарттары;

6) кассирдің тегі.

96. Жолаушыларды дауыс зорайтқыш байланысының көмегімен ақпараттандыру автовокзалдың, автостанцияның хабарлау желісі арқылы ұйымдастырылады.

Дауыс зорайтқыш байланысынан болған шу деңгейі санитарлық ережелер мен нормаларға сәйкес келуі тиіс.

97. Дауыс зорайтқыш байланысының көмегімен берілетін ақпараттың міндетті тізбесі өзіне мынадай ақпаратты қамтиды:

1) автобустардың, шағын автобустардың келу уақыты;

2) автобусқа мінудің басталатын уақыты (жөнелтуге дейін 15 минут бұрын) және автобустың жөнелтілетін уақыты (жөнелтуге дейін 5 минут бұрын);

3) қосымша рейстерді енгізу және оларға жол жүру құжаттарын (билеттерін) сату;

4) транзитпен жүретін автобустардың, шағын автобустардың тұратын уақытының қысқартылуы (ұлғайтылуы) туралы;

5) багажды қабылдау, сақтау және беру тәртібі;

6) жолаушыларға ұсынылатын негізгі қызметтердің тізбесi

Жолаушыларға көрсетілетін негізгі қызметтердің тізбесі туралы ақпарат автобустардың келуі мен жөнелтілуі туралы хабарландырулардың арасындағы аралықтарда беріледі. Әрбір хабарландыру мемлекеттік және орыс тілдерінде қайталанады.

98. Жолаушыларға ауызша анықтамалардың берілуін анықтама бюросының ақпаратшысы жүзеге асырады. Анықтама бюросы:

1) жұмыс уақыты мен ақпарат берушінің тегі көрсетілген, мемлекеттік және орыс тілдеріндегі, айқын көрінетін «Анықтама бюросы» деген маңдайша жазумен;

2) автобустардың осы автовокзалдан (автостанциядан) жөнелтілу, соңғы пунктке келу уақыты және барлық автобустардың, шағын автобустардың осы автовокзалға (автостанцияға) келу уақыты көрсетілген автобустардың, шағын автобустардың қозғалыс кестесімен;

3) осы автовокзалдың (автостанцияның) тура автобус қатынасы бар басқа облыстардың автовокзалдары мен автостанциялары бойынша автобустардың қозғалыс кестелерімен;

4) осы автовокзал (автостанция) қызмет көрсететін барлық маршруттар бойынша жол жүру мен багажды алып жүру құнының кестесімен қамтамасыз етіледі.

99. Автовокзалдың (автостанцияның) анықтама бюросы беретін анықтамалардың міндетті тізбесі:

1) осы автовокзал (автостанция) бойынша автобустардың, шағын автобустардың жөнелтілу және келу уақытын;

2) осы автовокзалдан жөнелтілетін барлық автобустардың, шағын автобустардың маршруттың барлық аялдау пункттеріне келу және тұру уақытын (автовокзал үшін ғана);

3) кесте бойынша рейске жөнелтілетін автобустардың, шағын автобустардың үлгілері мен маркаларын;

4) облыс маршруттары бойынша, сондай-ақ осы автовокзалмен тура автобус қатынасы бар басқа облыстардың автовокзалдары мен автостанцияларының маршруттары бойынша автобустардың, шағын автобустардың қозғалыс кестесін;

5) осы автовокзалда (автостанцияда) жолаушыларға ұсынылатын қызметтердің тізбесі мен құнын;

6) жол жүру және багажды алып жүру құнын;

7) автобустарда жолаушылардың жол жүру және багажды алып жүру, жол жүру құжаттарын (билеттерін) басқа рейске қайта ресімдеу ережелерін, сондай-ақ сапар шегу іске аспаған жағдайларда жол жүру мен багажды алып жүру құнын қайтару тәртібін;

8) үй-жайлардың орналасуы мен осы автовокзал (автостанция) қызметтерінің жұмыс режимін қамтиды.