2. Ахарактарызаваць сістэму педагагічных навук.

Педагогіка прайшла доўгі шлях свайго развіцця, назапасіла шмат інфармацыі і на сёняшні час пераўтварылася ў разгалінаваную сістэму ведаў. Таму сучасную педагогіку больш правільна называць сістэмай навук аб выхаванні.

Сістэма педагагічных навук уключае ў сябе: гісторыю педагогікі; агульную педагогіку, узроставую педагогіку, сацыяльную педагогіку, спецыяльную педагогіку, прыватныя методыкі і іншыя галіны.

Галіна педагогікі	Праблемы даследавання
Гісторыя педагогікі	Вывучае развіццё педагагічных ідэй і выхавання ў розныя гістарычныя эпохі.
Агульная педагогіка	Даследуе асноўныя заканамернасці выхавання, распрацоўвае агульныя асновы вучэбна-выхаваўчага працэсу.
Узроставая педагогіка	Вывучае асаблівасці выхавання людзей на розных узроставых этапах. Падзяляецца на пераддашкольную, дашкольную, школьную і педагогіку дарослых (педагогіка вышэйшай школы, педагогіка паслядыпломнай адукацыі,педагогіка працы, ваенная педагогіка).
Сацыяльная педагогіка	Вывучае асаблівасці выхавання людзей розных сацыяльных катэгорый. Утрымлівае тэарэтычныя і прыкладныя распрацоўкі ў галіне пазашкольнага выхавання і адукацыі дзяцей і дарослых. Вылучаюць галіны: сямейная педагогіка, прывентыўная педагогіка (вывучае асаблівасці прынуджальнага выхавання, перавыхавання правапарушальнікаў), прафілактычная педагогіка.
Спецыяльная педагогіка (дэфекталогія)	Вывучае асаблівасці навучання і выхавання людзей з адхіленнямі ў развіцці. Пытаннямі навучання і выхавання глуханямых і глухіх займаецца сурдапедагогіка; сляпых і слабабачачых – тыфлапедагогіка, разумоваадсталых – алігафрэнапедагогіка. Пытанні навучання і выхавання дзяцей з парушэннямі маўлення і гаворкі вывучае лагапедыя.
Прыватныя методыкі	Даследуюць спецыфіку выкарыстання агульных заканамернасцей навучання да выкладання і вывучэння канкрэтных вучэбных дысцыплін (методыка выкладання матэматыкі, методыка выкладання выяўленчага мастацтва і інш.).
Прафесійная педагогіка	Вывучае заканамернасці, ажыццяўляе тэарэтычнае абгрунтаванне , распрацоўвае прынцыпы, тэхналогіі выхавання і адукацыі чалавека, арыентаванага на канкрэтную прафесійную сферу дзейнасці. У залежнасці ад прафесійнай галіны вылучаюць ваенную, інжынерную, вытворчую, медыцынскую і іншыя галіны педагогікі.
Параўнальная педагогіка	Даследуе заканамернасці функцыянавання і развіцця адукацыйных і выхаваўчых сістэм у розных краінах шляхам супастаўлення і знаходжання падабенства і адрознення.
Лячэбная педагогіка	Распрацоўвае сістэму адукацыйна-выхаваўчай дзейнасці педагогаў з хворымі дзецьмі і ўкольнікамі з паслабленым здароўем. Узнікае інтэгрыраваная медыка-педагагічная навука, калі вядзецца лячэнне і навучанне ў ахоўваючым рэжыме.

Такім чынам, сучасная педагогіка з’яўляецца разгалінаванай навуковай сістэмай. У гэтай сістэме важнае месца займае педагогіка пачатковай школы – працэсы выхавання найбольш эфектыўна ідуць у дзіцячым узросце, і імі неабходна кваліфікавана кіраваць. Рапрацоўваючы свае праблемы, педагогіка абапіраецца на дадзеныя многіх навук. Сёння педагогіка, як адна з галоўных навук аб чалавеку, развіваецца вельмі інтэнсіўна.